Irına Kýznetsova kúresten Azııa chempıonatynyń altyn medalin jeńip aldy
ASTANA. QazAqparat - Úndistannyń Nıý-Delı qalasynda grek-rım, erkin jáne áıelder kúresinen jastar arasyndaǵy Azııa chempıonaty aıaqtaldy. Onda jerlesimiz Irına Kýznetsova altyn medaldy jeńip aldy, dep habarlaıdy QazAqparat.
QR Qorǵanys mınıstrliginiń Armııa ortalyq sport klýby baspasóz qyzmetiniń málimdeýinshe, sportshy shırek fınalda úndistandyq Ansha Anshany 3:2 esebimen, jartylaı fınalda qytaılyq Hınıan Sandy 5:0 esebimen tize búktergen. Fınaldyq básekede Japonııa ókili Rın Kondony 4:1 esebimen jeńip, qurlyq chempıonatynyń jeńimpazy atandy.
Irına Kýznetsova QR Qorǵanys mınıstrligi Armııa ortalyq sport klýbynyń sportshysy. Ol 62 kılogramǵa deıingi salmaq sanatynda óner kórsetti. Azııa chempıonatynyń qorytyndylaryna oraı, onda Qazaqstan áıelder quramasynyń qorjynyna budan basqa taǵy úsh qola, jalpy tórt medal salyndy.
