«Irıkla» sý qoımasyn qadaǵalaý: Qazaqstan-Reseı birlesken jumys toby quryldy

ASTANA. KAZINFORM – Reseıdiń Orynbor oblysynda, Jaıyq ózeniniń joǵarǵy aǵysynda ornalasqan «Irıkla» sý qoımasynyń jumysy qadaǵalanyp otyr. Bul týraly Sý resýrstary jáne ırrıgatsııa mınıstrliginiń Kazinform agenttiginiń saýalyna jaýabynda aıtylǵan.

— Qazaqstan men Reseıdiń arasyndaǵy kelissózder negizinde sý qoımalaryn kóktemgi tasqynǵa deıin bosatý josparlaryn anyqtaý jáne naqtylaý maqsatynda sý tasqyny kezindegi ózara is-qımyl jónindegi Qazaqstan-Reseı birlesken jumys toby quryldy, — delingen habarlamada.

Eki eldiń mamandary transshekaralyq sý qoımalary týraly aqparat almasyp otyrady. 

— Qazaqstan-Reseı birlesken jumys tobynyń sý tasqyny kezeńindegi áreketterin úılestirý boıynsha otyrysy barysynda taraptar transshekaralyq sý qoımalarynyń ornatylǵan, naqty jáne josparlanǵan jumys rejımderi týraly aqparatpen almasady. Sý qoımalaryna keletin sý aǵynynyń boljamdarymen jáne transshekaralyq ózenderdegi eń joǵary kútiletin sý deńgeıi boljamdary týraly da habardar etedi, — deıdi mınıstrlikten.

Sondaı-aq málimette atalǵan top sý qoımalarynyń jumys rejımderi, onyń ishinde sý qoımalaryn kóktemgi tasqynǵa deıin bosatý parametrleri boıynsha usynystardy ázirleıtini aıtylǵan.

Eske salsaq, byltyr elimizde alapat sý tasqyny boldy. Onyń bir sebebi kúz aılarynda jaýyn-shashyn kóp túsip, keıin kún kúrt sýýynan jerdiń toń bop qatyp qalýy sanaldy. Toń kóktemde sýdyń jerge sińýine kedergi jasap, qyzyl sý jaıylǵan.

Ekinshi bir sebep — sáýir aıynyń basynda Irıkla sý qoımasynan sekýndyna 1 600 tekshe metrge deıin sý jiberilýi. Sonyń áserinen Jaıyq sýy arnasynan asyp, tasydy.