Іri júk kemesi Sýets kanalyn bógep tastady
KAIR. QazAqparat – Mysyrdyń Sýets kanalynda iri júk kemesi qaıyrǵa turyp qalyp, álemdegi eń úlken saýda marshrýtynyń jolyn bógep tastady. «QazAqparat» HAA bul týraly VVS-ge silteme jasap habarlaıdy.
Seısenbi kúni sý syıymdylyǵy 200 myń tonnany quraıtyn Ever Green ataýy bar asa úlken konteıner tasymaldaýshy Sýets kanalynyń taıaz aýmaǵynda turyp qalyp, farvaterdi túgel bógep tastady. Kanal boıynsha qozǵalys buǵattaldy. Keme Qytaıdan Nıderlandydaǵy Rotterdam portyna bet alǵan.
«Kanaldyń ońtústik shekarasynan shamamen alty teńiz mılıa qashyqtyqta keme kenetten soqqan jeldiń ekpinine tap bolǵan. Osydan keme alǵan betinen aýytqyp, abaısyzda taıazdy jerge turyp qalǵan», - dep málim etti Ever Green kompanııasynan.
Saldarynan Sýets kanaly aýmaǵyndaǵy Qyzyl jáne Jerorta teńizinde 100-den kóp túrli kemeniń keptelisi týyndady.
RBK-nyń habarlaýynsha, kepteliste 10 mln barrelden astam munaıy bar tankerler tur.
Al Bloomberg-tiń jazýynsha, Ever Green kemesin ornyna jyljytý úshin eki táýlikke jýyq ýaqyt ketedi. Alaıda, osy merzimniń ózi energotasymaldaýyshtardy jetkizýde álemdik aýqymda irkilis týdyrý úshin jetkilikti bolyp otyr.
Uzyndyǵy 193 shaqyrymdy (120 mıl) quraıtyn Sýets kanaly álemdegi júktemesi eń kóp sý joldarynyń biri. Ol arqyly munaı tankerleri Taıaý Shyǵystan Eýropaǵa jáne Soltústik Amerıkaǵa munaı jetkizedi. Kanalǵa álemdik saýdanyń 12% jýyǵy jáne suıytylǵan tabıǵı gazdyń 8% tıesili. Sondaı-aq kún saıyn munda mıllıon barrelge jýyq munaı tasymaldanady.
