Іri jetkizýshiler Qazaqstanda 8 naýryzda gúl baǵasynyń aspandap ketýine ne áser etetinin aıtyp berdi

«QazAqparat» tilshisimen suhbattasqan gúl tasymalymen aınalysatyn «3DFlowers.kz» kompanııasynyń bas dırektory Erik Úsınov 8 naýryzda olardyń qunyna áser etetin birneshe sebepterdi atady.

«8 naýryzda gúl baǵasy shamamen 50 paıyzǵa ósedi. Onyń joǵarylaýy barlyq taraptardan oryn alady, onyń tizbegin jiktep kóretin bolsaq, birinshiden, osy mezgilde óndirýshiler gúldiń baǵasyn joǵarylatyp jiberedi. Mysaly, eń qymbat ónim - Ekvador rozalary. Katolıktik memleketterdiń naryǵyna shyǵatynyna qaramastan, gúldiń eń qymbat mezgili Valentın kúninde emes, dál 8 naýryzda bolady. Gollandııalyq aýktsıondarǵa qatysty tipti sózim joq, onda osy kezde úlken «oıyn» qyzyp ketedi», - deıdi ol.

Sonymen qatar, onyń aıtýynsha, kóliktik kompanııalar baǵany aspandatyp jiberedi. Qazirgi ýaqytta olar óz tarıfterin joǵarylatýda. Onyń ústine teńgeniń dollarǵa shaqqandaǵy baǵamynyń ózgerisi baǵaǵa áser etken.

«Sondaı-aq Gollandııada kóptegen kompanııalar jabylyp qaldy, degenmen suranys artpasa, kemigen joq», - deıdi E.Úsınov.

Búgingi ýaqytta Aqmola, Almaty jáne Ońtústik Qazaqstan oblystarynda gúl ósiretin jylyjaılar bar.

E.Úsınovtiń aıtýynsha, kompanııa qazaqstandyq taýarlardy saýdalamaýǵa tyrysady. «Óıtkeni olardyń sapasy tómen jáne kólemi de kóp emes», - dep atap ótti ol.

Onyń sózine qaraǵanda, jaı kúndermen salystyrǵanda 8 naýryzda gúlder 3-5 esege kóp satylady. Ónim shetelden ákelinedi. Nıderlandydan lalagúl, baqytgúl, Ekvadordan raýshangúl jetkiziledi.