Іri jeke sektor – ǵylymdy qarjylandyrýdyń negizgi kózi bolýy kerek – Prezıdent
«Ǵylymdy damyǵan eldermen birdeı qarjylandyrý deńgeıine qol jetkizý maqsatynda ǵylymı-zertteý jáne tájirıbelik-konstrýktorlyq jumystarǵa jeke ınvestıtsııalardy yntalandyrý qajet. Ǵylymdy qarjylandyrýdyń negizgi kózi retinde memlekettik bıýdjetpen qatar, jer qoınaýyn paıdalanýshylar men ulttyq kompanııalardyń qarajattary, iri jeke sektor – ónerkásiptik korporatsııalar jáne basqa da uıymdar tartylýy kerek», - dedi QR Prezıdenti Ulttyq ǵylym akademııasynyń 75 jyldyǵyna arnalǵan saltanatty sessııada sóılegen sózinde.
Prezıdent «Samuryq-Qazyna» qory janynan ǵylymı-tehnologııalyq bastamalar ortalyǵy qurylǵanyn eske saldy. Bul ortalyq ǵylymı ázirlemelerdi óndiriske engizý úshin ǵylymı qoǵamdastyqpen júıeli yntymaqtastyqta bolady.
«Jer qoınaýyn paıdalanýshylardyń paıdaly qazbalardy óndirýge ketetin qarjysynyń 1 paıyzyn ǵylymı-zertteý jáne tájirıbelik-konstrýktorlyq jumystarǵa aýdarý jáne aýdarymdar men qarajatty bólýdiń ashyqtyǵyn qamtamasyz etý jumystary júrgizilip jatyr. Ǵylymı-zertteý jáne tájirıbelik-konstrýktorlyq jumystar men jańa ǵylymı ortalyqtardy qurýǵa jeke ınvestıtsııalar úshin salyqtyq jáne ınvestıtsııalyq jeńildikterdi arttyratyn kez keldi dep esepteımin. Ǵylymı-zertteý jumystaryna jergilikti atqarýshy organdardy tartý qajet. Olar da ǵylymı-zertteý jáne tájirıbelik-konstrýktorlyq jumystardy qarjylandyra alýy kerek. Jergilikti jerlerde ǵylym, birinshi kezekte, oblys ekonomıkasynyń nazarynda turǵan máselelerdi sheshýge baǵyttalýǵa tıis», - dedi Qasym-Jomart Toqaev.
