Іri jáne shaǵyn bıznes nysandarmen 20-30 jyldyq strategııalyq kelisimshart jasaý kerek - ǵalym

NUR-SULTAN. QazAqparat – Ekonomıka ǵylymdarynyń doktory, professor Baýyrjan Isabekov eldegi iri bıznesti shaǵyn jáne orta bıznesti tapsyryspen qamtamasyz etýge mindetteýdiń tetigin jolǵa qoıýdy usyndy, dep habarlaıdy QazAqparat tilshisi.

«Habar» telearnasyndaǵy «Bolshaıa nedelıa» baǵdarlamasynyń bul joly sany Qazaqstandaǵy ınvestıtsııalyq klımat taqyrybyna arnalǵan bolatyn. Ekonomıst ǵalym Baýyrjan Isabekovtyń aıtýynsha, ınvestıtsııa árdaıym syrttan izdeı bermeı, bir ýaqyt jergilikti alpaýyttardy ulttyq ekonomıkaǵa jegý qajet.

«Álemdegi tájirıbe ekonomıkanyń ornyqty damýy úshin shaǵyn jáne orta bıznestiń jalyp ishki ónimdegi úlesi 50 paıyzdan tómen bolmaýy kerek ekenin kórsetedi. Halyqtyń osy salada jumyspen qamtylýy da 50 paıyzdan kem bolmaýy kerek. Bizdiń maqsatymyz osy bolýy kerek.

Ol úshin bizge ne kerek? Bizdiń tabıǵı baılyǵymyz mol ekeni ras. Biraq naryq óte qatal. Eshkim óz segmentin usynyp, yǵysyp ornyn bere salmaıdy. Sondyqtan, úlken, shaǵyn, orta bıznestiń kooperatsııasy kerek. Bul úsheýiniń basyn «qazaqstandyq mazmun» uǵymynyń aınalasynda qosýǵa bolady. Úlken, orta jáne shaǵyn bıznester arasynda 20-30 jylǵa strategııalyq qujattar bekitý qajet. Munaı óndirý, taý-ken metallýrgııa kesheni, astyq sharýashylyǵy sııaqty iri sýbektiler shaǵyn jáne orta bızneske tapsyrys berip otyrýy kerek», - dedi professor.

Ekonomıka ǵylymynyń doktory shaǵyn jáne orta bıznestiń jalpy ishki úlesin 50 paıyzǵa jaqyndatpaı turyp ınnovatsııa, ınvestıtsııalyq tartymdylyq týraly týraly oılaýdyń tıimdiligi shamaly degen pikir bildirdi.

«Jalpy ishki ónimniń qurylymynda shaǵyn jáne orta bıznestiń qazirgi úlesi 15-17 paıyz ǵana. Prezıdent aıqandaı 60 paıyzy kvazımemlekettik sektorǵa, 20-25 halyqaralyq menedjmenttiń úlesinde», - dedi Baýyrjan Isabekov.