Іri munaı-gaz jobalaryn damytýdyń keshendi jospary ázirlenedi - Smaıylov
«Munaı-gaz óndirý salasynda Teńizde 2023 jyly Saǵalyq qysymdy basqarý jobasy aıaqtalady. Qashaǵan ken ornynda qýaty 1,1 mlrd tekshe metr gaz óńdeý zaýytynyń qurylys jumystary bastaldy. Osyǵan qosa, óńdeý kólemi 8 mlrd tekshe metrge deıin gaz óńdeý zaýyttaryn iske asyrý jónindegi tujyrymdama kelisilýde. Batys Qazaqstan oblysynyń gaz óndeý zaýytynda qosymsha 3 mlrd tekshe metr Qarashyǵanaq gazyn óńdeý boıynsha tıisti joba pysyqtalýda. Sonymen birge, sheteldik ınvestorlarmen birlesip, Іri munaı-gaz jobalaryn damytýdyń keshendi jospary ázirlenetin bolady», - dedi Úkimet basshysy.
Onyń atap ótýinshe, osy saladaǵy kúrdeli jobalar úshin Jetildirilgen modeldik kelisimsharttar zańnamaǵa engizildi. Bul 2023 jyly Qalamqas-Hazar jáne Qaraton ken oryndary boıynsha 9 mlrd dollardy quraıtyn ınvestıtsııalyq jobalardy bastaýǵa múmkindik beredi.
«Aldaǵy jyly Kaspıı qubyr konsortsıýmynyń qazaqstandyq ýchaskesindegi tar jerlerin joıý jobasy aıaqtalady. Bul qubyrdyń ótkizý qabiletin jylyna 72,5 mln tonnaǵa deıin arttyrýǵa múmkindik beredi. Álemdik óndirýshilerdiń TOP-10 quramyna kiretin qýaty 500 myń tonna polıpropılen óndiretin iri munaı-hımııa zaýyty iske qosyldy. Qýaty 1,2 mln. tonna polıetılen óndirý jobasy boıynsha bazalyq jobalaý bastaldy», - dedi ol.
Premer-Mınıstr kelesi jyly jalpy ınvestıtsııa somasy 1 mlrd dollardy quraıtyn býtadıen jáne metanol óndiretin zaýyttardyń qurylysy bastalýy kerektigin aıtty.
«Munaı jáne munaı ónimderin jetkizý júıesindegi tıimsiz deldaldardy alyp tastaý boıynsha tıisti sheshimder qabyldandy. 2023 jyly Shymkent munaı óńdeý zaýytyn 9 mln tonnaǵa deıin keńeıtýdi bazalyq jobalaý bastalady. Bıtým óndirisi 300 myń tonnaǵa arttyrylatyn bolady», - dedi Álıhan Smaıylov.
