Іri kólemde jalǵan aqshalar jasap, ótkizýmen aınalysqan qylmystyq top ustaldy

ASTANA.  18 qyrkúıek. QazAqparat - Astana qalasy boıynsha Qarjy polıtsııasy departamentiniń qyzmetkerleri jalǵan aqsha belgilerin daıyndap, ony ótkizýmen aınalysqan qylmyskerlerdi ustaý boıynsha buryn-sońdy bolyp kórmegen operatsııany júzege asyrdy.

Іri kólemde jalǵan aqshalar jasap, ótkizýmen aınalysqan qylmystyq top ustaldy

 Bul týraly departamenttiń baspasóz qyzmetinen habarlandy.

Atap aıtqanda, aǵymdaǵy jyldyń 12 qyrkúıeginde Qarjy polıtsııasynyń elordalyq  departamenti elimizdiń birqatar aýmaǵynda 10 000 teńgelik jalǵan aqshalar daıyndaý jáne ótkizýmen aınalysqan uıymdasqan qylmystyq toptyń belsendi múshelerine qatysty  QR QK 235 baby boıynsha qylmystyq is qozǵaǵan.

«2011 jyldyń tamyz aıynan beri elimizdiń barlyq aımaqtaryna jalǵan aqsha qarajattaryn ótkizýmen aınalysqan turaqty uıymdasqan qylmystyq top qyzmeti anyqtaldy. Uıymdasqan qylmystyq top Jambyl jáne Ońtústik Qazaqstan oblysynyń 7 turǵynynan quralǵan. Qazirgi ýaqytta jalǵan aqsha jasaý qylmysyna basqa adamdardyń qatystylyǵy da anyqtalyp jatyr», - delingen baspasóz habarlamasynda.

Sonymen qatar, elimizdiń birqatar aımaqtarynda júrgizilgen jedel-izdestirý sharalary barysynda 20 mıllıon teńgeden asatyn jalǵan aqshalar jáne aqsha belgilerin daıyndaýǵa arnalǵan  jabdyqtar  (Taraz qalasynda jalǵan aqshalar daıyndaýǵa arnalǵan zamanaýı kompıýterlik tehnologııalyq jabdyqtarmen jaraqtanǵan shaǵyn tseh) tárkilengen. Sonymen qatar, uıymdasqan qylmystyq toptyń 100 mln.teńge somasynda jalǵan aqsha qarajattaryn daıyndaýǵa qatystylyǵy da tekserilýde.

«Qylmyskerler, jalǵan aqshany elimizdiń 3 baǵyty boıynsha taratyp otyrǵan. Onyń birinshi baǵyty - batys  aımaq (Mańǵystaý, Aqtóbe, Batys Qazaqstan, Atyraý oblystary); ekinshisi  - ońtústik ( Almaty qalasy, Jambyl, Ońtústik Qazaqstan, Kyzylorda oblystary); úshinshisi - soltústik-shyǵys (Aqmola, Qostanaı, Qaraǵandy, Pavlodar, Shyǵys Qazaqstan obysy jáne Astana qalasy).  Qylmyskerler jalǵan aqsha qarajattaryn sybaılastary arqyly shaǵyn toptamalarmen ótkizip otyrǵan.  Al sybaılastary jalǵan aqshalardy iri qalalarǵa nemese alys eldi mekenderge tasymaldaǵan. Máselen, astanalyq taksı júrgizýshisi jalǵan aqshalardy ótkizýmen aınalysyp, ózi de  qosymsha tabys tapqan», - delingen baspasóz aıǵaǵynda.