Іri kólemde para alǵan Energetıka mınıstrliginiń qyzmetkeri 8 jylǵa sottaldy

NUR-SULTAN. QazAqparat – Elordanyń Almaty aýdany boıynsha №2 sotynda Energetıka mınıstrliginiń basqarma basshysy Nurbek Amangeldiulyna qatysty para alý faktisi boıynsha úkim jarııalandy, dep habarlaıdy QazAqparat tilshisi.

Buǵan deıin Nur-Sultan qalasy boıynsha Sybaılas jemqorlyqqa qarsy qyzmet Energetıka mınıstrliginiń basqarma basshysy Nurbek Amangeldiulyna qatysty isti sotqa joldaǵan bolatyn. Ol gaz jelisi uıymdarynyń ókilderinen iri kólemde (jalpy somasy 6,3 mln teńge) aqsha aldy degen kúdikke ilindi. Ol 2020 jyldyń 16 qarashasynan bastap qamaýda boldy.

«Sot Nurbek Amangeldiulyn qylmys jasaǵany úshin kináli dep tanýǵa jáne oǵan qaýipsizdigi tómen QAJ mekemesinde jazasyn ótep, memlekettik qyzmette, sýdıa, jergilikti ózin-ózi basqarý organdarynda, QR Ulttyq banki men onyń vedomstvolarynda, Qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, memlekettik uıymdar men kvazımemlekettik sektor sýbektilerinde laýazym atqarý quqyǵynan ómir boıyna aıyra otyryp, 8 jyl bas bostandyǵynan aıyrý túrindegi jaza taǵaıyndaýǵa úkim shyǵardy. Nurbek Amangeldiulyna qamaýǵa alý túrindegi bultartpaý sharasy úkim zańdy kúshine engenshe sol kúıi qaldyrylsyn», - dedi sýdıa.

Sonymen birge, «SK LTD KZ» JShS basshysy bolǵan B. B. Ýtarovqa da úkim shyǵaryldy.

Qylmystyq kodekske sáıkes Ýtarov qylmys jasaǵany úshin (para bergeni úshin) kináli dep tanylyp, oǵan qaýipsizdigi tómen QAJ mekemesine 3 jylǵa deıin bas bostandyǵynan aıyrý jazasy taǵaıyndaldy.