Іri kásiporyndardyń ýájine qaramastan Ekologııa kodeksi ýaqytynda qabyldanady – Pirimqulov
NUR-SULTAN. QazAqparat – Іri kásiporyn qaýymdastyqtarynyń ýájine qaramastan Ekologııa kodeksi ýaqytynda qabyldanady. Ekologııa, geologııa jáne tabıǵı resýrstar vıtse-mınıstri Ahmetjan Pirimqulov osylaı dep málim etti, dep habarlaıdy QazAqparat tilshisi.
«Ekologııaǵa qatysty máseleler qashan da mańyzdy. Tótenshe jaǵdaı rejımi – ol máseleni umyta turatyn kezeń emes. Alaıda qazirgi tańda iri ónerkásiptik qaýymdastyqtar Ekologııa kodeksin qaraý merzimin basqa ýaqytqa aýystyrýdy surap jatyr. Olardyń negizgi ýáji – koronavırýs pandemııasynyń saldaryn eńserip alsaq deıdi. Qazir bárine de ońaı emes. Ony túsinip otyrmyz. Alaıda Ekologııa kodeksi men onyń qabyldaný merzimi qazirgi ahýaldy kúrdelendirmeıtinin atap ótkimiz keledi», - dedi Ahmetjan Pirimqulov OKQ-da onlaın rejımde ótken baspasóz máslıhatynda.
Vıtse-mınıstrdiń aıtýynsha, Qazaqstanda ekologııa jaǵdaıy óte nashar.
«Keıingi jańalyqtarǵa ǵana qulaq túreıik. Teńizde peshtiń toqtap qalýynan aýaǵa gaz taralyp ketti. Al «Arselor Mıttal Temirtaý» kompanııasyndaǵy jylý elektr ortalyǵynyń shatyrynyń órtenýinen atmosferalyq aýa lastandy. Keıingi bir jyldy alyp qarasańyz, mundaı mysaldardy kóptep keltirýge bolady. Sol sebepti ekologııa salasyndaǵy jańa ári qatań talaptardy búginnen bastap engizý kerektigin túsiný kerek», - dedi ol.
