Іri qara mal aýktsıonynda eń qymbat buqa 1 mln 300 myń teńgege satyldy
ASTANA. 2 mamyr. QazAqparat - El tarıhynda tuńǵysh ret ótkizilgen iri qara maly aýktsıonynda eń qymbat buqa 1 mln 300 myń teńgege satyldy,
dep habarlaıdy Baq.kz aqparattyq portaly KazBIN-ge silteme jasap.
«KazBeef Ltd» kompanııasy uıymdastyrǵan aýktsıonǵa 50 bas iri qara - angýs jáne gereford tuqymdy 25 buqa, 25 qunajyn shyǵaryldy. Buqalardyń ortasha salmaǵy - 510 keli, qunajyndar 400 keli tartady.
Aýktsıonǵa Qaraǵandy, Aqmola, Qostanaı, Almaty, Jambyl, ShQO, OQO, BQO oblystarynyń sharýashylyqtarynyń ókilderi qatysty. Aýktsıon baǵasyn belgileýde Pavlodar oblysynyń bir sharýashylyǵynan kelgen ókil rekord ornatty. Ol angýs tuqymdy buqaǵa 1,3 mln teńge usyndy.
Bul sharany tamashalaýǵa Aýyl sharýashylyǵy vıtse-mınıstri Músilim Ómirıaev, «QazAgro» holdınginiń basqarma tóraǵasy Berik Beısenǵalıev jáne AQSh-tyń Qazaqstandaǵ Tótenshe jáne ókiletti elshisi Kennet Feırfaks kelipti.
«KazBeef Ltd» JShS dırektory Beıbit Erýbaevtyń aıtýynsha, kelesi aýktsıon aldaǵy jyldyń sáýir-mamyr aıynda ótkizilmek. Ol kezde de saýdaǵa 50 bas mal shyǵarylmaq.
