Іri qalalar mańyndaǵy saıajaılarda órt qaýipsizdigi jaǵdaıy nashar - TJK
ASTANA. QazAqparat - Órt qaýipsizdigi boıynsha iri qalalar mańyndaǵy saıajaılardaǵy jaǵdaı qıyn. Bul týraly búgin Astanada ótken baspasóz máslıhatynda QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Qys kezinde turýǵa qolaısyz saıajaı úıleri turǵylyqty baspanalar retinde paıdalanylýda. Máselen, bıylǵy 22 qyrkúıekte Almaty jáne Pavlodar oblystarynda kómir jaǵatyn peshtiń aqaýy saldarynan 6 adamǵa ys tıip, aýrýhanaǵa jatqyzyldy. Dál sol kúni Ońtústik Qazaqstan oblysyndaǵy saıajaıda da peshten shyqqan ýly gazdan 1 adam ýlanyp, kóz jumdy», - dedi resmı ókil.
Onyń sózine qaraǵanda, kúz jáne qys merzimderinde jeke turǵyn úıler sektorynda pesh ornatý men paıdalaný kezinde órt qaýipsizdigi qaǵıdalary eskerilmeıtin jaǵdaılar kezdesip jatady. Osy sebep boıynsha 2014-2015 jyldardaǵy jylý berý kezeńinde 1 149 órt tirkeldi.
Atalǵan kezeńde memlekettik órtke qarsy qyzmet organdary 556 adamdy qutqarǵan, sonymen qatar 61 mlrd. teńgeden astam somadaǵy materıaldyq qundylyqtardy saqtap qaldy.
«Jylý berý maýsymynda órttiń negizgi sebepteri halyqtyń otty abaısyz paıdalanýy (1731 jaǵdaı nemese 33 paıyz), elektr jabdyqtaryn montajdaý men tehnıkalyq paıdalaný talaptaryn buzý (814 jaǵdaı nemese 15 paıyz), sondaı-aq peshterdi ornatý jáne paıdalaný kezinde órt qaýipsizdigi qaǵıdalaryn saqtamaý (1 149 nemese 22 paıyz) saldarynan bolyp jatady»,-dedi R. Imanqulov.
