Іri ınvestor: Mal sharýashylyǵyn damytýǵa bolatyn álemdegi eki eldiń biri - Qazaqstan
ASTANA. QazAqparat - Búgin Ortalyq kommýnıkatsııalar qyzmetiniń brıfıngisine qatysqan «Inalca Eurasia» transulttyq kompanııasynyń vıtse-prezıdenti Andreı Vakýlın «álemde mal sharýashylyǵyn damytýǵa bolatyn eki jer bar bolsa, sonyń biri - Qazaqstan» dep málim etti.
Áleýetti ınvestordyń aıtýynsha, jalpy, iri qarany damytý, ony kóbeıtip, paıda tabý - óte uzaq ınvestıtsııalyq protsess. Investıtsııa eń keminde 10 jylda qaıta paıdasyn bere bastaıdy, deıdi sarapshy.
«Qazir Qazaqstan mal sharýashylyǵyn damytyp, ony qoldaý úshin úlken baǵdarlamany júzege asyryp jatyr. Memleket sharýa qojalyqtaryna kómektesý úshin, óńdeýshi kásiporyndardy damytý úshin, jaıylymdardy jaqsartý úshin tıisti qadamdardy qolǵa alyp otyr. Bul - bıznesti óte qyzyqty ete túsedi»,-deıdi ınvestor.
«Álemde mal sharýashylyǵyn damytýǵa bolatyn eki el bar bolsa, sonyń biri - Qazaqstan» degen pikirin aıta kele ol kórshi elderdiń suranysy Qazaqstannyń mal sharýashylyǵyna ınvestıtsııa salý úshin qolaıly deıdi.
«Álemdegi sıyr etin ımporttaıtyn eń iri eki el Reseı men Qytaı. Qytaı halqynyń ál-aýqaty jaqsarǵan saıyn sıyr etin ımporttaı túsedi. Qytaıda sıyr etine degen suranys jyl saıyn eselenip otyr»,- dep atap ótti A.Vakýlın.
