Іri bıznes sýbektilerinen memlekettik bıýdjetke 3 trln teńge tústi

NUR-SULTAN. QazAqparat - Іri bıznes sýbektilderinen memlekettik bıýdjetke 3 trln teńge tústi. Bul týraly Memlekettik kirister komıteti iri salyq tóleýshiler departamentiniń dırektory Anýar Súleımenov aıtty, dep habarlaıdy QazAqparat tilshisi.

«Monıtorıngte turǵan 343 salyq tóleýshi iri bıznes sýbektileri sanalady. Onyń ishinde 99-y – jer qoınaýyn paıdalanýshylar, 244-i – ekonomıkanyń ár túrli sektorlaryndaǵy iri salyq tóleýshiler. Olarǵa memlekettik bıýdjetke 44 paıyz jáne respýblıkalyq bıýdjetke 51 paıyzdan astam salyq túsimder tıesili. Máselen, osy jyldyń 9 aıynyń qorytyndysynda iri bıznes sýbektilerinen memlekettik bıýdjetke túsetin túsimder 1 270 mlrd teńgege nemese 36 paıyzǵa ulǵaıyp, 3 302,3 mlrd teńge boldy», - dedi departament dırektory Ortalyq kommýnıkatsııalar qyzmetinde ótken baspasóz máslıhatynda.

Onyń dereginshe, respýblıkalyq bıýdjetke túsimder 840,1 mlrd teńgege nemese 50 paıyzǵ ulǵaıyp, 2 520,7 mlrd teńge boldy. Kóterme jáne bólshek saýda 26 paıyzǵa nemese 274,8 mlrd teńgege; óńdeý ónerkásibi 17,4 paıyzǵa nemese 184,8 mlrd teńgege; qarjy jáne saqtandyrý qyzmeti, jyljymaıtyn múlikpen operatsııalar 14,2 paıyzǵa nemese 151 mlrd teńgege; qubyrjoly arqyly tasymaldaý 38,7 paıyzǵa nemese 33 mlrd teńgege ósti.

«Túsimderdiń ulǵaıýy pandemııadan keıin ekonomıkany qalpyna keltirý jáne salyqtyq ákimshilendirý sapasyn jaqsartý kezeńine keldi. Ákimshilendirý sapasynyń jaqsarýyna táýekelderdi baǵalaý júıesi aqparattyq júıesin paıdalana otyryp, salyqtyq tekserýlerdi taǵaıyndaý áser etti. Osy júıeni qoldaný táýekel dárejesin baǵalaý kórsetkishteri negizinde salyqtyq tekserýler úshin iri bıznes sýbektilerin naqty irikteýge múmkindik berdi. Onda tekserýler táýekeldiń joǵary dárejesine jatqyzylǵan salyq tóleýshilerge qatysty taǵaıyndalady. Jalpy, 2021 jylǵy 9 aıda iri salyq tóleýshilerdi 34 salyqtyq tekserý aıaqtaldy. Júrgizilgen tekserýlerdiń nátıjesi boıynsha 46,5 mlrd teńge salyqtar men ósimpuldar qosa esepteldi», - dedi Anýar Súleımenov.