Іri bankterdiń marketıng aktsııalary tutynýshylyq kredıtterdiń ósýine yqpal etti

ASTANA. QazAqparat – Іri bankterdiń marketıng aktsııalary tutynýshylyq kredıtteýdiń ósýine yqpal etti. Bul týraly QR Ulttyq bankiniń tóraǵasy Ǵalymjan Pirmatov málim etti, dep habarlaıdy QazAqparat tilshisi.

«Ekonomıkanyń ósý traektorııasy bazalyq stsenarııge sáıkes qalyptasýda. Ulttyq statıstıka bıýrosynyń aldyn ala baǵalaýyna sáıkes, 2022 jyldyń qorytyndysy boıynsha jalpy ishki ónim 3,1 paıyzǵa artty. Іskerlik belsendiliktiń ósýine negizinen eldiń taýar óndirisindegi oń dınamıka sebep boldy. Eń kóp ósýdi qurylys salasy kórsetti – 9,4 paıyz jáne rekordtyq astyq jınaý aıasynda aýyl sharýashylyǵy – 9,1 paıyz. Qyzmet sektory boıynsha saýda, kólik jáne baılanys salalarynda ósý baıqaldy. Osyǵan baılanysty 2022 jyly jalpy ishki ónimniń ósýi Ulttyq bank baǵalaýynyń joǵarǵy shegine jaqyn qalyptasty»,- dedi UB tóraǵasy BAQ ókilderine arnalǵan brıfıngte.

Onyń dereginshe, 2022 jyly úı sharýashylyqtarynyń suranysy oń dınamıkasyn saqtaǵanmen, ósý qarqyny baıaý boldy.

Buǵan halyqtyń naqty kiristerine teris yqpal etken joǵary ınflıatsııa sebep boldy.

«Tutynýshylyq kredıttiń ósýi de suranysqa áser etti. 2022 jylǵy qarasha aıynyń sońynda tutynýshylyq kredıtter jyl basynan bastap 7,6 trln teńgege deıin 24,1 paıyzǵa ulǵaıdy. Іri bankterdiń marketıngtik aktsııalary tutynýshylyq kredıtteýdiń ósýine yqpal etti. Osyǵan baılanysty bólshek saýda aınalymynyń dınamıkasy turaqty ósim qarqynyn kórsetedi», - dedi Ǵalymjan Pirmatov.