Іri asteroıd Jerge óte jaqyn qashyqtyqta ushyp ótedi
ASTANA. QazAqparat - 2018 jyldyń 15 mamyrynda ólshemi 60 metrdan 130 metrge deıin bolatyn Asteroıd 2010 WC9 jerden qaýipsiz qashyqtyqta ushyp ótedi, dep habarlaıdy «QazAqaparat» HAA korrespondenti.
Aspan denesiniń Jerdiń qasynan ushyp ótýi mundaı kólemdegi asteroıdtyń bizdiń planetamyzǵa óte jaqyn kelýi bolyp sanalady.
Astronomdar alǵash ret Katalına aspan sholýynyń kómegimen 2010 WC9 asteroıdyn 2010 jylǵy 30 qarashada baıqap, sol jyldyń 10 jeltoqsanyna deıin baqylaǵan.
Kózge ilikken kúnnen 8 jyl ótken soń, 2018 jyldyń 8 mamyrynda, astronomdar aspan denesin taýyp, oǵan ZJ99C60 degen ataý beredi. Sodan soń olar baıaǵy 2010 WC9 asteroıdyna qaıta ushyrasqandaryn túsinedi.
Asteroıd jerden 203453 km qashyqtyqta ótedi, bul - Jer men Aıdyń arasyndaǵy qashyqtyqtyń 0,53 kólemi. Jet Propulsion Laboratory NASA boljamy boıynsha, 2010 WC9 asteroıdy 300 jyldan beri Jerge eń jaqyn qashyqtyqta ushyp ótken asteroıd bolyp otyr.
Foto: davydov.in
