IRho-ǵa Saýd Arabııasy atynan qatysqan oqýshyny Qazaqstandaǵy dástúrge degen uqyptylyq tańqaldyrdy
ASTANA. QazAqparat - Fızıka boıynsha 45-shi Halyqaralyq olımpıadaǵa (IRho) Saýd Arabııasy atynan qatysqan Zııad Ál-Harıbıdi Qazaqstanda dástúrge uqypty qaraý ereksheligi tańqaldyrǵanyn atap ótti. Bul jaıynda ol QazAqparat tilshisine bergen suhbatynda aıtty.
«Qazaqstanǵa kelgenimizge birneshe kún ótti. Osy ýaqyt ishinde jergilikti mádenıetpen tanysyp úlgerdik. Atap aıtqanda, halyqtyń óziniń dástúrine muqııat qaraýy tańqaldyrady. Sizder salttaryńyzdy osy ýaqytqa deıin jaqsy saqtap kelgensizder. Qazirgi zamanǵy jaǵdaıda kóptegen elderde dástúrdi umytpaı, jas urpaqqa jetkizý - qıyn másele», - deıdi Z. Ál-Harıbı.
Sonymen qatar Saýd Arabııasynan kelgen meıman Astanadaǵy bilim olımpıadasynyń uıymdastyrylýyna jeke toqtaldy.
«Bul olımpıada barsha álemnen kelgen oqýshylar úshin naǵyz merekege aınaldy. Biz tez dostasyp aldyq. Basymyz qosyla qalsa, tek fızıka jaıynda ǵana emes, sonymen qatar ózge taqyryptarda da pikir almasýdamyz. Ár elden kelgen adamdardyń dostasýy úshin jaqsy jaǵdaı jasaǵanyna uıymdastyrýshylarǵa úlken alǵysymdy aıtqym keledi. Astanadaǵy olımpıadada biz naǵyz baqytty jastyq shaǵymyzdy ótkizýdemiz», - dedi ol.
Aıta keteıik, Fızıka boıynsha 45-shi Halyqaralyq olımpıadaǵa álemniń 85 elinen delegattar qatysýda.
Birneshe kúnnen beri jas fızıkter 2 týrǵa qatysyp, teorııalyq jáne eksperımenttik turǵyda qazirgi zamanǵy fızıka salasynda ózderiniń bilim deńgeıin kórsetti. Eki týrdyń qorytyndysy boıynsha 45-shi IPhO-nyń halyqaralyq qazylar alqasy jeńimpazdar men júldegerlerdi anyqtady.
Jeńimpazdardyń esimderi búgin tústen keıin Beıbitshilik jáne kelisim saraıynda marapattaý rásiminde belgili bolady.
