IRhO: Ámir Birálın, Tursynbek Nurıslam, Isa Danat «altyn» medal aldy
ASTANA. QazAqparat - Fızıka boıynsha 45-shi Halyqaralyq olımpıadada (IRhO) Qazaqstan namysyn qorǵaǵan mektep oqýshylary 3 altyn men 2 kúmis júldege qol jetkizdi. Bul týraly búgin elordadaǵy Beıbitshilik pen kelisim saraıynda atalǵan bilim báıgesiniń jeńimpazdaryn marapattaý aldynda tilshilerge bergen suhbatynda IRhO-ny uıymdastyrýshy komıtet men akademııalyq komıtettiń múshesi, fızıkadan Qazaqstan ulttyq qurama komandasynyń jattyqtyrýshysy Ernur Rysmaǵambetov málim etti.
Onyń sózine qaraǵanda, bul bilim saıysynda «altyn» medaldi Ámir Birálın, Tursynbek Nurıslam, Isa Danat ıelendi. Al Nurbek Dinmuhammed pen Dáýlet Qurmantaev «kúmis» júldeni enshiledi.
E. Rysmaǵambetov Qazaqstan namysyn qorǵaǵan bes oqýshynyń barlyǵy júldeli bolǵanyn atap ótti. «Ár jylda osy olımpıadaǵa 5 baladan qatysqanyn eskersek, sońǵy alty jylda barlyǵy 30 oqýshy fızıkadan bul básekege tústi. Sonyń 29-y elimizge medalmen oraldy», - dep toqtaldy ol.
«Jalpy olımpıada joǵary deńgeıde ótti dep nyq senimmen aıtýǵa bolady. Barlyq jetekshiler rıza boldy. Biz IRhO-ny este qalarlyqtaı etip uıymdastyrýǵa tyrystyq. Uıymdastyrý kezinde kóptegen tyń sharalardy engizdik», - dedi E. Rysmaǵambetov.
Budan buryn habarlanǵandaı, Halyqaralyq olımpıadada Qazaqstan myqty elderdiń ondyǵyna enip, resmı emes komandalyq esepte 8-orynda tuǵyrlandy. Osy bilim básekesinde elimizdiń aldyna Qytaı, Taıvan, Koreıa, Vetnam, Úndistan, Reseı elderi tur.
Aıta keteıik, 13 shildede bastalǵan bul bilim saıysy elordadaǵy Nazarbaev Ýnıversıteti bazasynda ótti. Atap aıtqanda, fızıkadan Astanada uıymdastyrylǵan osy bilim dodasyna Qazaqstanǵa álemniń 85 elinen 400-ge jýyq oqýshy keldi.
