Yrǵyzda tutas bir aýyldyń turǵyndary qaýipsiz jerge kóshirilip jatyr
AQTÓBE. KAZINFORM — Aqtóbe oblysy Yrǵyz aýdanyndaǵy Mamyr aýylynyń turǵyndary evakýatsııalanyp jatyr. Aýylda tek er adamdar qalyp, ózgesi aýdan ortalyǵyna kóshirile bastady.
Yrǵyz aýdanynda osydan úsh kún buryn tótenshe jaǵdaı jarııalandy. Qazirgi kezde munda Torǵaı ózeninen sý kelip jatyr.
Nura aýyldyq okrýgine qarasty Mamyr aýyly turǵyndarynyń alǵashqy legi aýdan ortalyǵyna jetkizildi.
— Sý deńgeıi ortasha. Qazir bógetterdi bekitý, aýyldy qorshap bóget salý jumystary júrgizilip jatyr. Munda bir K700, eki traktor, bir tıegish tehnıka men 35 adam bar. Al balalar men áıelder aýdan ortalyǵy Yrǵyzǵa evakýatsııalanyp jatyr. Mamyrda tirkeý boıynsha 152 adam bolsa, qazir bala-shaǵa men áıelderdi qosqanda 90-ǵa jýyq adam kóshirilip jatyr. Al er azamattar tasqynǵa qarsy kúres jumystaryna jumyldyryldy. Torǵaı jaǵynan kelgen sý deńgeıiniń kóterilip jatqanyna eki kún bolyp qaldy, — dedi Nura aýyldyq okrýginiń ákimi Aqnar Omarov.
Onyń aıtýynsha, qazirgi kezde tikushaqpen 33 adam jiberildi. Al 55 adam kólikpen aýyldyq okrýg ortalyǵy Nuraǵa jetkizilgen.
— Tikushaq Mamyr aýylyna taǵy keledi. Kelesi reıske minetin adamdar daıyndaldy. Sonymen birge Nura aýylyna jetkizilgen osy aýyl adamdary da aýdan ortalyǵyna tikushaqpen jetkiziledi. Aýylǵa sý kirmedi. Bógetti bıiktetip, qapqa qum toltyryp jatyrmyz. Aqtóbeden shyqqan áskerıler áli jetpedi, — dedi Aqnar Omarov.
Eske salsaq, TJM Aqtóbe oblysy boıynsha áskerı bóliminen jáne tótenshe jaǵdaılar departamentinen 14 adam men 8 tehnıka (4 samosval, 2 tral jáne 2 júk tıegish) jedel túrde aýdanǵa jiberildi.
Munda vıtse-premer Serik Jumanǵarın, Tótenshe jaǵdaılar vıtse-mınıstri Serik Tólenbergenov jáne Aqtóbe oblysy boıynsha tótenshe jaǵdaılar departamentiniń basshysy Nurǵalı Júnisov te bardy.
