Іrgeli istiń basyndaǵy isker áıelder
NUR-SULTAN. QazAqparat - «Áıel – bir qolymen besikti terbetse, ekinshi qolymen álemdi terbetedi» degen jaqsy sóz bar.
Munyń astarynda áıel adamnyń kez-kelgen aýqymdy isterge aralasa alatynyn, úlken nátıjelerge qol jetkize alatynyn ańǵartatyn maǵyna jatyr. Óıtkeni, qoǵamnyń túrli salalaryndaǵy jetistikterde áıelderdiń úlesi bar ekeni aqıqat.
Keıingi kezderi aýyl sharýashylyǵymen jáne basqa da kásip túrlerimen aınalysyp júrgen názik jandar jeterlik. Memlekettik baǵdarlamalar arqyly qoldaýǵa ıe bolǵan kásipker áıelderdiń jetistikke jetkenderi de az emes. Máselen, memlekettik qoldaýdyń bir tetigi sanalatyn Aýyl sharýashylyǵyn qarjylaı qoldaý qory sońǵy bes jylda 55 myń kásipkerge nesıe bergen bolsa, onyń 19 myńy kásipker áıelderge tıesili eken. Sózimiz dáleldi bolý úshin birneshe mysal keltire ketkendi jón kórdik.
Tirshiligin tiginshilikpen baılanystyrady
Qyzylorda qalasynda turatyn Jadyra Qulmyrzaeva tirshiligin tiginshilikpen baılanystyrǵan kásipker. Balabaqshada, kolledjde jáne taǵy birneshe jerde shákirt tárbıelep, jumys istegen kásipker bir kúni óziniń tigin sheberhanasyn ashýǵa bel býady. Óıtkeni, bala kúninen ismerlikke qumar Jadyranyń eki ájesi de tóńirekke belgili sheber adamdar eken. Tiginshilik óner qanmen daryǵan deıdi.
2013 jyly bir dúkenniń buryshynan shaǵyn ǵana tigin sheberhanasyn ashqan kásipker, 2017 jyly Aýyl sharýashylyǵyn qarjylaı qoldaý qorynan nesıe alyp, ekinshi sheberhanasyn iske qosypty.
Tapsyrystyń kóptep túsýine baılanysty araǵa úsh jyl salyp, bıyl óz qarajatymen úshinshi sheberhanasynyń lentasyn qıdy. Kásipker onshaqty adamǵa jumys berip otyr.
«Men bala kúnimnen tigin tigýge qumar boldym. Óz ájem de, naǵashy ájem de ismer adamdar. Bul maǵan qanmen daryǵan óner dep oılaımyn. Óner óz aldyna. Al, sol ónerdi kásipke aınaldyrý, tabys tabý ońaı emes, árıne. Biraq, óziń súıip isteıtin jumys bolǵandyqtan, barlyǵyna shydaıdy ekensiń. Qıyndyqtardy jeńe bilseń ǵana jetistikke jetesiń. Eń aldymen adaldyq, tabandylyq, tózimdilik sııaqty qasıetter óte qajet», - deıdi úsh bala tárbıelep otyrǵan tiginshi kásipker.
Gúlnár Rahymjanova: bala kúnimnen jylqyǵa jaqyn boldym
Aýyl sharýashylyǵyn qarjylaı qoldaý qory kásipker áıelderdi shaǵyn nesıe berý arqyly qoldap kele jatqan uıym. Ásirese, aýyldy jerlerde mal sharýashylyǵymen aınalysatyn áıelderdiń eńbegi eren ekenin aıta ketken jón.
Mysaly, Qaraǵandy oblysynyń Aqadyr kentinde turatyn kásipker áıel Gúlnár Rahymjanova jylqy sharýashylyǵymen aınalysady. Jigitterdiń júregi daýalamaıtyn isti qolǵa alǵan kásipkerdiń ákesi kezinde jylqy fermasynyń brıgadıri bolǵan eken. Bala kúninen atqa minip, taıjarystan qalmaıtyn erke qyz bolashaǵyn tek aýylmen baılanystyrady.
Ol byltyr Aýyl sharýashylyǵyn qarjylaı qoldaý qorynan jylqy ósirý maqsatynda 3,3 mln teńge nesıe alǵan bolatyn.
«Bala kúnimnen jylqyǵa jaqyn boldym. Jylqy degen tórt túliktiń tóresi ǵoı. Ákem jylqy fermasynyń brıgadıri boldy. Saýmal, qymyz iship, atqa minip óskenbiz. Negizi bilimim ekonomıst. Qarjyger jáne zańger mamandyqtary boıynsha eki joǵary bilimim bar. Bolashaǵymdy tek aýylmen baılanystyramyn. Qalanyń qarbalasqan ómiri unamaıdy. Qalaǵa bir kún barsam, aýylǵa tezirek qaıtýǵa asyǵamyn. Aýyl sharýashylyǵyn qarjylaı qoldaý qorynan nesıe rásimdep, jylqy satyp aldym. Qazir ózimde onshaqty jylqym bar. Aldaǵy ýaqytta bıe saýyp, qymyz daıyndaýdy josparlap otyrmyn. Negizi josparlarym óte kóp. Onyń bárin ýaqyt kórsetedi», - deıdi kásipker.
Búgingi tańda Aýyl sharýashylyǵyn qarjylaı qoldaý qorynyń 48 myńnan astam klıenti bar. Sonyń úshten birin kásipker áıelder quraıdy.
«Ótken jyly Qor jalpy kásipkerlikpen aınalysatyn áıelderge 21,5 mlrd teńge baǵyttaǵan. Kásipker áıelderdiń bir ereksheligi – alǵan nesıesin ýaqytynda óteıdi jáne mindettemege óte jaýapkershilikpen qaraıdy. Qor kez kelgen kásipkerlik maqsattaǵy jobalardy qarjylandyrý men bıznes-bastamalardy iske asyrýda árqashan kásipker áıelderge qoldaý kórsetýge ázir», - deıdi «Aýyl sharýashylyǵyn qarjylaı qoldaý qory» AQ basqarýshy dırektory Dýman Ospanov.
