Іrgeli ǵylymnyń aqsap jatqan sebebi naqty saladaǵy zertteýshiler az - Sattar Májıtov
ALMATY. 16 qarasha. QazAqparat /Erlik Erjanuly/ - Іrgeli ǵylymnyń aqsap jatqan sebebi naqty saladaǵy zertteýshiler az. Bul týraly búgin Almatyda «Qazaqstan tarıhy: jańa ǵylymı-ádistemelik kózqaras jáne zertteý nátıjeleri" degen taqyrypta ótken «Temirqazyq» ulttyq sarapshylar klýbynyń otyrysynda aıtyldy.
"Táýelsizdik jyldary ár joǵary oqý orny óz-ózine dıssertatsııalyq ǵylymı keńes ashty. Onda qajetti, qajetsiz jasandy doktorlar men kandıdattardy kóptep daıyndadyq. Solardyń arqasynda biz bir-birimizben suhbattasýdan qaldyq", - deıdi Reseı jarytylystaný ǵylymdary jáne Halyqaralyq aqparattandyrý akademııalarynyń akademıgi, tarıh ǵylmynyń doktory, professor Sattar Májıtov. Sh. Ýálıhanov atyndaǵy tarıh jáne etnologııa ınstıtýtynyń bólim meńgerýshisiniń aıtýynsha, zertteý ornynda qazir shtatta 59 adam bar. Onyń jeteýi ákimshilikte, taǵy jeteýi bólimderde laborant bolyp jumys isteıdi. Sonyń nátıjesinde ár bólimde naqty zertteý jumysymen 4-5 adam ǵana aınalysady. Al zertteý ınstıýty keshendi izdenis júrgizý úshin máselen Qarluq qaǵanatyn zertteý úshin arnaıy 1 maman ustaýy kerek. Qazaq júzderiniń qalyptasýyn zertteý úshin keminde 1 maman ustaýy kerek. Sondyqtan da naqty saladaǵy zertteýshilerdiń azdyǵynan irgeli ǵylymnyń damýy aqsap keledi. Sondaı-aq derektermen jumys isteý úshin til bilý kerek. "Mysaly, ózbekter «Tarıhı Rashıdıdi» orys tiline aýdarǵan kezde qazaqqa qatysty nárselerdiń bári alyp tastaǵan. Tipti, Kereı men Jánibek qazaqta eshqandaı úlken ról atqarmaǵan deıdi. Jalpy, eshqandaı muraǵat eshqashan tolyq derekti bermeıdi. Kóshirip ber dep tapsyrys berseń tek úzindisin ǵana beredi. Sondyqtan ǵylymmen aınalysý úshin úlken jankeshtilik kerek. Sankt-Peterbýrgtegi tarıh ınstıtýtynan Kenesaryǵa baılanysty 3 papka derekterdi kóshirip alýǵa óz basym 4 jyl ýaqytymdy jumsadym", - deıdi Sattar Fazyluly.
