IRGCN: Ormýz buǵazy arqyly áskerı kemelerdiń ótý áreketteri toqtatylady
ASTANA. KAZINFORM – Iran Islam revolıýtsııasy saqshylar korpýsynyń (IRGCN) áskerı-teńiz kúshteri Ormýz buǵazy arqyly áskerı kemelerdiń ótýine baǵyttalǵan kez kelgen áreketti qatań túrde toqtatatynyn málimdedi. Bul týraly Tasnimnews.ir habarlady.
Tasnim agenttigi jarııalaǵan mátinde: Áskerı kemelerdiń buǵaz arqyly ótýge baǵyttalǵan kez kelgen áreketine qatań ári sheshimdi túrde tosqaýyl qoıylady», delingen.
Sonymen qatar qolbasshylyq amerıkalyq kemelerdiń buǵaz arqyly ótkeni týraly aqparatty da joqqa shyǵardy.
Aıta keteıik, buǵan deıin AQSh Ortalyq qolbasshylyǵy (CENTCOM) eki amerıkalyq esmınets — USS Frank E. Peterson jáne USS Michael Murphy Ormýz buǵazy arqyly ótip, teńiz mınalaryn tazartý operatsııasyna kiriskenin habarlaǵan edi.
Reuters agenttiginiń málimetinshe, qazirgi ýaqytta Ormýz buǵazy arqyly keme qozǵalysy qalypty kólemniń 10 paıyzynan da tómen deńgeıde qalyp otyr. Bul álemdik munaı jetkizilimine tikeleı áser etip, energııa tasymaldaýshylar baǵasynyń ósýine sebep bolýy múmkin.
Ormýz buǵazy álemdik munaı men suıytylǵan tabıǵı gaz tasymalynyń negizgi teńiz dálizderiniń biri sanalady. Sarapshylardyń baǵalaýynsha, álemdik munaı eksportynyń shamamen besten biri osy baǵyt arqyly ótedi. Sondyqtan óńirdegi kez kelgen áskerı shıelenis jahandyq naryqqa tikeleı yqpal etedi.
Sonymen qatar Islamabadta AQSh pen Iran arasyndaǵy kelissózder jalǵasyp jatyr. Halyqaralyq BAQ málimetinshe, taraptar arasyndaǵy negizgi kelispeýshilik máseleleriniń biri – dál osy Ormýz buǵazyn baqylaý máselesi bolyp otyr.
Osyndaı jaǵdaıda KSIR-diń búgingi málimdemesi aımaqtaǵy shıelenistiń áli de joǵary deńgeıde ekenin kórsetedi.
Aıta keteıik, AQSh pen Iran arasyndaǵy 14 saǵatqa sozylǵan kelissózder búgin de jalǵasady.
Al Iran Ormýz buǵazy arqyly AQSh esmınetsteriniń ótkenin joqqa shyǵardy.
