Irekli qoımasynan Jaıyqqa sekýndyna 108 tekshe metr sý jiberilip jatyr

ORAL. KAZINFORM – Orynbor oblysynda Irekli qoımasynan 14 aqpannan bastap Jaıyq ózenine jiberilip jatqan sý kólemi sekýndyna 108 tekshe metrge jetti.

«Qazsýshar» RMK Batys Qazaqstan fılıaly dırektorynyń mindetin atqarýshy Raýan Husaıynovtyń Kazinform tilshisine málim etkenindeı, ótken jyly osy merzimde Irekliden Jaıyqqa sekýndyna 15 tekshe metr sý quıylǵan bolatyn.

- Budan ázirge qaýip joq. Jaıyqtaǵy sýdyń deńgeıi qatty kóterilmeıdi. Sý óńirge 25-30 kúndeı ýaqytta, naýryzdyń ortasyna qaraı jetedi, - dedi maman.

Onyń aıtýynsha, qazirgi kezde Jaıyq ózeniniń Oral qalasy tusyndaǵy deńgeıi – 157 santımetr. Ótken jyly osy merzimde 138 santımetr bolǵan edi. 

«Qazgıdromet» RMK BQO fılıalynyń aldyn ala boljamyna qaraǵanda, bıyl Derkól ózeniniń deńgeıi qaýipti shekten asýy yqtımal. Osyǵan baılanysty Tasqala jáne Báıterek aýdanynda ózen boıynda ornalasqan aýyldarǵa, oǵan qosa Oral qalasyna qaýip tónýi múmkin. 

Eske sala keteıik, budan buryn Irekli qoımasynan Jaıyq ózenine jiberiletin sý kólemi artatynyn jazǵan bolatynbyz.