Irekli qoımasynan Jaıyq ózenine jiberiletin sý kólemi ulǵaıtyldy

ORAL. KAZINFORM – Reseıdiń Orynbor oblysyndaǵy Irekli qoımasynan Jaıyq ózenine 15 aqpannan sekýndyna 139 tekshe metr sý jiberile bastady.

«Qazsýshar» RMK Batys Qazaqstan fılıalynyń dırektory mindetin atqarýshy Raýan Husaıynovtyń málim etkenindeı, buǵan deıin bir aı boıy sekýndyna 90 tekshe metr sý jiberilip kelgen edi.

Onyń sózine qaraǵanda, qazirgi kezde atalǵan sý qoımasy 82,5 paıyzǵa toltyrylǵan. Bos syıymdylyǵy – 570 mln tekshe metr. 

– Aǵymdaǵy gıdrologııalyq rejımge sáıkes 15 naýryzǵa deıin qoımadaǵy sý kólemi 950 mln tekshe metrge jetkizilmek. 2024 jyly Irekliden bosatylǵan maksımaldy sý shyǵyny sekýndyna 2 170 tekshe metrge jetse, ótken jylǵy tasqyn kezinde 201 tekshe metr boldy. Jaıyqqa sý túsimi sekýndyna 1 800 tekshe metrden asqan jaǵdaıda ózen jaıylmasy men jaǵadaǵy saıajaı alqaptaryn sý basady, - dedi R.Husaıynov.

Onyń aıtýynsha, aldyn ala boljam negizinde bıyl Irekli qoımasyna 0,7-1,3 mlrd tekshe metr sý túspek. Qalypty mólsheri – 1,22 mlrd tekshe metr. 2025 jyly sý túsimi 1-2 mlrd tekshe metr kóleminde boljanyp, naqty kólemi 1,180 mlrd tekshe metr boldy. 

Eske sala keteıik, budan buryn Orynbor oblysynda Irekli qoımasynan Jaıyq ózenine 15 qańtardan bastap sekýndyna 90 tekshe metr sý jiberile bastaǵanyn jazǵan edik.

Batys Qazaqstanda sý tasqynynan keler qaýip qandaı ekeni de habarlandy. 

Sý tasqynyna daıyndyq barysynda BQO-nyń birqatar aýdanynda tehnıkalar sany sáıkes kelmeı otyr.