Irekli qoımasynan Jaıyq ózenine jiberiletin sý kólemi artady

ORAL. KAZINFORM – Orynbor oblysyndaǵy Irekli sý qoımasynan Jaıyq ózenine jiberiletin sý kólemi 14 aqpannan bastap artady. 

Orynbor oblysynyń gýbernatory Denıs Pasler Irekli qoımasyna sýdyń mol kelip jatqanyn aıtyp, «Rosvodresýrsy» mekemesinen sýdy bosatý mólsherin kóbeıtýdi talap etken.

Gıdrologtardyń derekteri boıynsha, aımaqta topyraqta ylǵal mol, qardaǵy sý qory normaǵa jaqyn. Jaýyn-shashyn qalypty túsken kezde qoımaǵa sýdyń túsýi normadan 70 paıyzǵa deıin joǵary bolady dep baǵalanyp otyr. 

- Aýa raıy men «Rosgıdromet» boljamyn eskere otyryp, sý bosatý kólemi sekýndyna 100-120 tekshe metrge jetýi múmkin. Federaldyq qurylymdar sheshimdi taıaý ýaqytta qabyldaýy kerek dep esepteımin, - dedi D.Pasler. 

Ural56.ru saıtynan alynǵan málimetke qaraǵanda, sý bosatý kólemi 14 aqpan kúni saǵat 08.00-den bastap sekýndyna 110 tekshe metrge deıin jetedi. Bul týraly sheshim sý qoımasy jumysyn retteý jónindegi vedomstvoaralyq jumys tobynyń otyrysynda qabyldanǵan. 

«Qazsýshar» RMK Batys Qazaqstan fılıalynyń naqtylaýynsha, Irekli qoımasynan Jaıyq ózenine ótken jyldyń 27 jeltoqsanynan beri sekýndyna 60 tekshe metr sý bosatylýda. Bıylǵy 11 aqpandaǵy málimet boıynsha Jaıyq ózeniniń deńgeıi Oral qalasy tusynda 157 sm, ıAnvartsev beketinde 233 sm boldy. 

Eske sala keteıik, budan buryn BQO-da kóktemgi sý tasqynyna daıyndyq barysynda birqatar másele sheshilmeı otyrǵanyn jazǵan edik.