Irannyń soltústik-shyǵysynda jer silkinisi boldy
ASTANA. Shildeniń 31-i. QazAqparat - Irannyń soltústik-shyǵysynda jer silkinisi boldy. Zilzala saldarynan eń az degende 110 adam jaralanǵan, bir zardap shegýshi aýyr jaǵdaıda jatyr, dep habarlaıdy «Maıak» radıosy.
Jerasty dúmpýiniń kúshi 6 baldy shamalaǵan. AQSh-tyń Geologııalyq qyzmeti osyndaı málimet keltirýde. Amerıkandyq ǵalymdardyń aqparaty boıynsha, jer silkinisinen Tegrannyń shyǵysyna qaraı 700 shaqyrymdaı jerde ornalasqan Týrbat Heıdarııa qalasy qatty zardap shekken.
IRNA agenttiginiń habarlaýynsha, zilzala saldarynan birqatar nysandar zardap shekken, kóshelerde turǵan kólikter zaqymdanǵan, elektr jelisi men telefon baılanysy buzylǵan. Adam qurbandyqtary men qatty qıraýlar joq. Degenmen, ýálaıat halqyna ázirge úılerine kirmeı, dalada júre turýlaryna keńes berilip otyr. Apat aýdanynda qutqarýshylar jumys istep jatyr.
