Irannyń ShYU qabyldaý týraly ótinishi qazirgi kúni qaralmaıdy - SІM
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde Qazaqstan Respýblıkasynyń Shanhaı Yntymaqtastyq Uıymy jumysy jónindegi Ulttyq úılestirýshi, QR SІM Aıyryqsha tapsyrmalar jónindegi elshisi Shahrat Nuryshev málim etti. Eske salaıyq, brıfıng Dýshanbedegi ShYU múshe memleketter Basshylary keńesi otyrysynyń qorytyndylaryna arnalǵan bolatyn.
Shahrat Nuryshevtyń aıtýynsha, búgingi kúni ShYU-na Úndistannan, Pákistannan jáne Irannan ótinishter kelip túsken. Al Dýshanbe sammıtinde bular boıynsha pikir almasý ótip, al olardy nysanaly túrde talqylaý sammıtten keıin, kelesi otyrysqa deıin qaralmaq.
«Úndistan Dýshanbe sammıtine bir apta qalǵanda ótinish tapsyrdy. Al Pákistan tarapy 2006-2010 jyldar aralyǵynda ótinish berip kelse, bul joly atalǵan eldiń delegatsııasy ShYU múshe-memleketi mártebesin ıelený týraly qyzyǵýshylyǵyn taǵy da qýattady. Al Irannyń ótinishine kelsek, qazirgi kúni Uıym ol ótinishti qaraı almaıdy. Óıtkeni 2010 jyly qabyldanǵan jańa múshelerdi qabyldaý tártibi týraly Erejege sáıkes, múshelikke enetinderde Birikken Ulttar Uıymynyń sanktsııalary bolmaýy kerek», - dedi Sh. Nuryshev.
Budan bólek, SІM ókili memleket basshysy N. Nazarbaevtyń osy máselege qatysty ustanymyn da atap ótti. Onyń aıtýynsha, Qazaqstan «altylyq» pen Iran arasyndaǵy kelissózder úderisiniń ilgerileýin qoldaıdy ári onyń tabysty aıaqtalatynyna senim bildiredi, al munyń ózi Irannyń ShYU-na múshelikke úmitker bolýyna zor múmkindik týǵyzbaq. Toqtala ketetin jaıt, buǵan deıin Elbasy N. Nazarbaev Astanadaǵy Iran Prezıdenti Hasan Rýhanımen kezdesýi barysynda Qazaqstannyń beıtarap el retinde óz aýmaǵynan kelissózder alańyn usynýǵa ázir ekenin jetkizgen bolatyn.
Aıta keteıik, ShYU múshe-memelketteri basshylarynyń 14-shi Keńesi 11-12 qyrkúıekte Dýshanbe qalasynda ótken bolatyn.
