Irannyń ShYU-ǵa kirý sharty jarııalandy

NUR-SULTAN. QazAqparat- «Ashyq NQA» saıtynda «Iran Islam Respýblıkasynyń Shanhaı yntymaqtastyq uıymyna múshe memleket mártebesin alý maqsatyndaǵy mindettemeleri týraly memorandým jobasy jarııalandy, dep habarlaıdy QazAqparat tilshisi.

Iran Islam Respýblıkasy Hartııanyń maqsattary men qaǵıdattaryn, Sharttyń erejelerin, sondaı-aq ShYU sheńberinde qabyldanǵan halyqaralyq sharttar men qujattardy saqtaýǵa mindettenedi.

Iran Islam Respýblıkasynyń osy Memorandýmnyń kúshine enýi úshin qajetti memleketishilik rásimderdi oryndaǵany týraly ShYU Hatshylyǵy habarlamany alǵan kúnnen bastap Iran Islam Respýblıkasy 2022 jylǵy 1 jeltoqsanǵa deıingi merzimde Hartııaǵa, 2001 jylǵy 15 maýsymdaǵy Terrorızmge, separatızmge jáne ekstremızmge qarsy kúres týraly Shanhaı konventsııasyna jáne olardyń hattamalaryna qosylýǵa mindetteme alady.

Iran Islam Respýblıkasy osy Memorandým kúshine engen jaǵdaıda halyqaralyq sharttarǵa qosylý quqyǵyn alady. Iran Islam Respýblıkasy olarǵa 2023 jylǵy 15 sáýirge deıingi merzimde qosylýǵa mindettenedi.

Barlyǵy 40-tan astam qujat rásimdelgennen keıin memleket basshylary Iranǵa uıymǵa múshe mártebesin berý týraly sheshim qabyldaıdy.

ShYU-ǵa múshe memleketter basshylary keńesiniń kelesi otyrysy osy jyldyń 15-16 qyrkúıeginde Samarqandta ótedi dep josparlanǵan.