Irannyń Býsher qalasynda qurylysyna Reseı taraby atsalysqan atom-elektr stansasynyń ashylý rásimi ótti
ASTANA. Tamyzdyń 21-i. QazAqparat - Búgin Irannyń ońtústigindegi Býsher qalasynda qurylysyna Reseı taraby kómektesken atom-elektr stansasasynyń ashylý rásimi ótti. Búginnen bastap kásiporynǵa ıadrolyq otynnyń jetkizilimi bastaldy, dep habarlaıdy Associated Press agenttigi.
Stansanyń ashylý saltanatyna reseılik «Rosatom» memlekettik korporatsııasynyń bas dırektory Sergeı Kırıenko men Irannyń Atom energııasy jónindegi uıymynyń basshysy Álı Akbar Salehı qatysty. Býsherdegi stansa - Irandaǵy alǵashqy atom-elektr stansasy.
«Rosatom» basshysy Sergeı Kırıenko óz sózinde atap kórsetkendeı, «bul jobanyń biregeıligi sol, mamandar stansany osydan 30 jyldan astam buryn nemis kompanııasy irgetasyn qalaǵan eski nysannyń negizinde turǵyzyp otyr». Býsher atom stansasyn energetıkalyq iske qosý sharasy 2010 jyldyń sońyna deıin ótedi, dep habarlady S.Kırıenko.
Óz kezeginde, Álı Akbar Salehı búgingi kúndi este qalatyn tarıhı oqıǵa dep atady. Ol sondaı-aq, atom stansasyn turǵyzýda jáne aldyńǵy qatarly tehnologııalardy ıgerýde Iranǵa kórsetip otyrǵan qoldaýlary úshin Reseıge jáne reseı halqyna alǵys bildirdi. Onyń aıtýynsha, Býsherdegi stansanyń reaktory ıadrolyq otynmen qyrkúıektiń 22-sine qaraı tolyq qamtamasyz etiletin bolady. 10 kúnde atom stansasyna 80 tonna ýranǵa barabar otyn jetkizilmek. Bastapqy kezeńde stansanyń ónimdiligi 500 megavatty quraıtyn bolady dep paıymdalýda, biraq keıinnen bul kórsetkishti 1 myń megavatqa jetkizý josparlanýda.
Býsherdegi atom stansasynyń qurylysyn Siemens kompanııasynyń batysgermanııalyq Kraftwerk Unioin kontserni sonaý 1975 jyly bastaǵan bolatyn. Biraq Irandaǵy revolıýtsııadan keıin GFR Islam respýblıkasyna qarsy sanktsııalarǵa qosylyp, stansanyń qurylysy toqtatylǵan edi. 1992 jyly Tegran men Máskeý atom-elektr stansasynyń qurylysyn aıaqtaý týraly kelisimshartqa otyryp, onyń ashylý rásimi 1999 jylǵa belgilengen bolatyn. Biraq ta keıinnen jumystardyń aıaqtalý merzimi birneshe ret keıinge ysyrylyp keldi. Endi mine búgin, 2010 jyly tamyzdyń 21-i kúni Býsher atom-elektr stansasy jumysyna kiristi.
