Irannyń áskerı ınfraqurylymdarynda birneshe qýatty jarylys boldy

ASTANA.QazAqparat – Shyǵys Ázerbaıjan provıntsııasyndaǵy Shahıd-Salımı qalasynda qozǵaltqysh maılaryn shyǵaratyn iri zaýyt órtendi. Ushqyshsyz ushatyn apparattar ortalyq provıntsııadaǵy Isfahan qalasynda áskerı qoıma men oq-dári óndiretin ortalyqqa shabýyldady, dep habarlaıdy QazAqparat BBC News agenttigine silteme jasap.

Sonymen qatar Irannyń batysyndaǵy Dızfýl qalasynda avıabazada jarylys bolyp, eldiń batysyndaǵy Hamadan men soltústigindegi Resht qalalarynda órt bolǵan.

Jarylystyń daýsy Tegeran qalasynan da estilip jatyr. Jergilikti turǵyndardyń habarlaýynsha, ákimshilik ǵımarattarǵa shabýyl jasalǵan.

Kýágerlerdiń sózinshe, Iranda ushaqtar kókke kóterildi. Irannyń Qorǵanys mınıstrligi oq-dári óndiretin ortalyqtardyń birine ushqyshsyz ushatyn aparattardyń shabýyldaǵanyn rastap otyr.

«28 qańtar kúni saǵat 23:30-dar shamasynda ushqyshsyz ushatyn apparattardy paıdalanyp, Qorǵanys mınıstrliginiń ortalyqtarynyń birine sátsiz shabýyl jasaldy»,-delingen vedomstvonyń habarlamasynda.

Apparattardyń birin áýe qorǵanys júıesi atyp túsirgen. Taǵy eki apparat «qorǵanys qaqpanyna» túsip, jarylyp ketti.

Qazirgi tańda mert bolǵandar men zardap shekkender týraly málimet joq.