Irannyń 132 qalasynda koronavırýstyń taralý qaýpi seıildi
TEGERAN. IRNA – QazAqparat – Iran prezıdenti Hasan Rýhanı eldiń 132 qalasynda koronavırýstyń taralý qaýpiniń tómendegenin jarııalady, dep habarlaıdy QazAqparat IRNA agenttigine silteme jasap.
Qaýip deńgeıi tómen 132 qalada meshitter ashylyp, juma namazy oqylatyny málim boldy.
Otyrysta prezıdent kornavırýs ınfektsııasynyń taralýyn toqtatýǵa arnalǵan Densaýlyq saqtaý mınıstrligi jarııalaǵan hattamany saqtaǵany úshin el turǵyndaryna alǵysyn aıtty.
Iran prezıdentiniń aıtýynsha, koronavırýs ınfektsııasy bar adamdardy anyqtaýdyń birinshi kezeńi aıasynda 50 mıllıonnan, ekinshi kezeńinde – 30 mıllıonnan astam skrınnıngten ótken.
Prezıdent pandemııanyń aıaqtalý merzimi ázirge belgisiz ekenin habarlady. Ol sondaı-aq, álem boıynsha 80-nen astam ortalyq vırýsqa qarsy vaktsına ázirleýge tyrysp jatqanyn atap ótti.
Rýhanı sonymen qatar mektepterdi 9 nemese 16 mamyrdan bastap ashý týraly usynystar kelip túskenin habarlady. Biraq naqty sheshim áli qabyldanǵan joq.
3 mamyr kúngi sońǵy derekter boıynsha Iranda koronavırýs juqtyrǵandar sany 96448 adamǵa jetken. 6156 adam vırýstan qaıtys bolǵan. 77350 adam emdelip, aýrýhanadan shyǵaryldy.
