Irannyń Joǵary Kóshbasshysynyń áskerı keńesshisi soǵysty toqtatýdyń úsh shartyn atady
ASTANA. KAZINFORM — Irannyń Joǵary Kóshbasshysy Modjtaba Hameneıdiń áskerı keńesshisi, Islam revolıýtsııasy Saqshylar korpýsynyń burynǵy qolbasshysy jáne Maqsattylyq keńesiniń múshesi Mohsen Rezaı eldegi soǵysty toqtatýdyń úsh shartyn atady. Bul týraly Report agenttigi jazdy.
Rezaı soǵys barlyq zalal ótelgenge, barlyq ekonomıkalyq sanktsııalar alynyp tastalǵanǵa deıin jáne AQSh Irannyń ishki isterine aralaspaıtynyna kepildik berilgenge deıin jalǵasady dep málimdedi.
— Bul bizdiń halqymyzdyń, kóshbasshymyzdyń jáne Qarýly Kúshterimizdiń sheshimi. AQSh Irannyń ekonomıkasyna 47 jyl nuqsan keltirdi jáne onyń damýyna kedergi jasady, — dep atap ótti áskerı keńesshi.
Onyń pikirinshe, Irannyń qarsylastary eldi bes bólikke bólgisi keledi.
— AQSh Býsherdi, Hýzestandy jáne Ilamdy (Iran provıntsııalaryn) Venesýela sekildi munaı qorymen ıemdengisi keledi, — dedi Rezaı.
Eske sala keteıik, AQSh pen Izraıl 28 aqpanda Iranǵa qarsy áskerı operatsııa jasap, birqatar qalalarǵa áýe shabýyldaryn jasady. Buǵan jaýap retinde Iran Izraıl aýmaǵynda zymyrandar atyp, Parsy shyǵanaǵy elderindegi amerıkandyq áskerı bazalarǵa shabýyldady. Jaǵdaıǵa baılanysty aımaqtyń birqatar memleketteri áýe keńistigin ýaqytsha jaýyp tastady. Sol kúni Irannyń joǵarǵy basshysy Alı Hameneı soqqylardan qaza tapty.
Aıta keteıik, Donald Tramp kelissózder aıasynda Iranǵa soqqy berýdi ýaqytsha toqtatty. AQSh prezıdenti sońǵy eki kún ishinde AQSh pen Iran arasynda Taıaý Shyǵystaǵy qaqtyǵysty «tolyq ári túpkilikti retteýge» baǵyttalǵan «óte jaqsy jáne nátıjeli kelissózder» ótkenin málimdedi. Alaıda Iran Syrtqy ister mınıstrliginiń resmı ókili Ismaıl Baǵaı sońǵy 24 kún ishinde AQSh-pen eshqandaı kelissóz ben dıalog bolmaǵanyn habarlady.
