Irannyń Joǵarǵy kóshbasshysy alǵashqy raqymshylyq jarlyǵyna qol qoıdy
QYZYLORDA. KAZINFORM — Irannyń Joǵarǵy kóshbasshysy aıatolla Modjtaba Hameneı túrli qylmys úshin sottalǵan 2 myńnan astam azamatqa qatysty raqymshylyq jasaý týraly jarlyq shyǵardy. Bul týraly onyń Telegram-arnasynda jarııalanǵan habarlamada aıtylǵan, dep habarlaıdy TASS.
Habarlamada jarlyqta «raqymshylyq jasaý nemese jazany jeńildetý» qarastyrylǵany atap ótilgen.
Bul – Modjtaba Hameneı ákesi, Irannyń burynǵy Joǵarǵy kóshbasshysy Alı Hameneı qaza tapqannan keıin eldiń Joǵarǵy kóshbasshysy bolyp saılanǵannan beri qol qoıǵan alǵashqy raqymshylyq jarlyǵy.
Modjtaba Hameneı ázirge jurtshylyq aldyna shyqqan joq.
Eske salsaq, Modjtaba Hameneıdiń Irannyń Joǵarǵy kóshbasshysy bolyp saılanǵany týraly 9 naýryzda belgili bolǵan edi. Buǵan deıin onyń 28 aqpandaǵy qaqtyǵystyń alǵashqy kúni jaralanǵany habarlanǵan bolatyn. Sol kezde jasalǵan áýe soqqysy saldarynan onyń ákesi Alı Hameneı qaza tapqan.
Keıinirek Modjtaba Hameneı saılanǵannan keıin alǵash ret halyqqa úndeý joldady. Málimdeme memlekettik telearna efırinde oqylyp, mátini jergilikti buqaralyq aqparat quraldarynda jarııalandy. Alaıda ol kamera aldyna jeke ózi shyqqan joq.
