Irannyń jańa saılanǵan kóshbasshysynyń alǵashqy málimdemesi jarııalandy
ASTANA. KAZINFORM - Irannyń jańa Joǵarǵy kóshbasshysy osy laýazymǵa saılanǵannan keıin alǵash ret kópshilikke málimdeme jasady. Ol áskerdi óńirdegi AQSh bazalaryna soqqyny jalǵastyrýǵa shaqyrdy.
Modjtaba Hameneıdiń málimdemesi memlekettik telearnanyń efırinen taratyldy, mátin sonymen qatar jergilikti BAQ-ta da jarııalandy. Ol kameranyń aldyna ózi shyqqan joq.
- Jaýynger baýyrlar! Halyq qorǵanýdy talap etip otyr. Ormýz buǵazy sııaqty qysym kórsetý quralyn budan ári de qoldana berý kerek, - dedi jańa saılanǵan aıatolla. Sondaı-aq ol Irannyń syrtqy agressııaǵa berilmeıtinin aıtqan.
Sonymen qatar aıatolla óziniń áıeli kóz jumǵanyn, al 28 aqpan kúni AQSh pen Izraıldiń alǵashqy operatsııasy kúni ápkesi men onyń kúıeýiniń jáne balasynyń mert bolǵanyn rastady.
Kishi Hameneı ózi saılanǵannan soń el aldyna shyqqan joq jáne búginge deıin málimdeme jasaǵan emes. Osyǵan deıin BAQ ókilderi Irannyń jańa kóshbasshysynyń Amerıka men Izraıldiń jaqynda jasaǵan shabýyldarynan jaraqat alǵanyn jazǵan bolatyn. Irannyń syrtqy ister mınıstrligi kóshbasshysynyń jaǵdaıy jaqsy jáne qaýipsiz jerde ekenin aıtyp otyr.
Osyǵan deıin Modjtaba Hameneı Irannyń Joǵarǵy Kóshbasshysy bolyp saılanǵany týraly jazdyq.
