Irannyń ımporty arzanyraq - Mańǵystaýda aýyl sharýashylyǵy ónimin satýda másele bar
AQTAÝ. KAZINFORM – Mańǵystaý oblysynyń ónim óndirýshi kásipkerleri úshin ózekti másele - jergilikti aýyl sharýashylyǵy ónimderiniń ımporttalatyn azyq-túlikpen básekege túsýi bolyp otyr. Bul týraly premer-mınıstrdiń orynbasary Serik Jumanǵarın Mańǵystaýǵa jumys sapary aıasynda aıtyldy.
Aqtaýda bıznesti damytý máseleleri boıynsha ótken basqosýda jergilikti kásipkerler syrttan jetkiziletin azyq-túlikpen básekege túsý aıtýly máselege aınalǵanyn atap ótti.
«Kásipkerler maýsym kezinde qııardy Irannan kóptep ımporttaıdy jáne olardy jergilikti ónimge qaraǵanda eki ese arzan baǵada satady. Mysaly, qııardy bir kılogramyna 500 teńgeden satady, al jergilikti qııar bir kılogramyna 1000 teńgegeden satylady. Sebebi Iranda qunnyń jartysyn memleket sýbsıdııalaıdy, mundaı ádis bizde qarastyrylmaǵan. Bul turǵyndarǵa qııardy arzan baǵamen satyp alýǵa múmkindik beredi. Alaıda, jergilikti ónim ekologııalyq jaǵynan áldeqaıda taza, óıtkeni olar tasymaldaý kezinde uzaq saqtalý úshin ártúrli tyńaıtqyshtarmen óńdelmeıdi, — dedi „doktor Agro“ JShS dırektory Baıram Qazym.
Sonymen birge, Munaıly aýdanynyń turǵyny kókónisterdiń birneshe túrin ósiretin jylyjaı týraly usynysyn alǵa tartty. Bıyl ol lavanda alqabyn egýdi josparlap otyrǵanyn aıtty. Onyń aıtýynsha, bul týrısterdi tartyp qana qoımaı, qosymsha jumys ornyn ashýǵa járdemdespek. Alaıda, qazirdiń ózinde jylyjaıda jumys kúshi tapshy bolyp otyr.
«Bizdiń óńirde jumyssyzdar kóp, biraq qandaı da bir sebeptermen olar jylyjaıda jumys istegisi kelmeıdi. Barlyǵy munaı salasynda qyzmet atqarǵandy jón sanaıdy. Biz jumyspen qamtý ortalyǵyna jylyjaıdaǵy bos jumys oryndary týraly ótinim jiberemiz, biraq eshkim aýyl sharýashylyǵy salasyna kelmeıdi», — dedi Almagúl Qarasaeva.
Óz kezeginde Serik Jumanǵarın Mańǵystaý oblysynyń agroónerkásiptik salasyn damytý úshin bıyl 2,5 mlrd.teńge sýbsıdııa kózdelgenin jáne qarjy kólemi ulǵaıatynyn atady.
«Búgingi tańda aýyl sharýashylyǵynyń ózekti máseleleriniń biri — ózimizdi negizgi azyq-túlik ónimderimen tolyq qamtamasyz etý. Zertteý derekteri boıynsha qazaqstandyqtar tutyný shyǵyndarynyń jartysyn azyq-túlikke jumsaıdy. Bul shyǵyndardyń 17 paıyzy etke, onyń ishinde taýyq etine, 8 paıyzy astyq ónimderine (nan, jarma jáne t. b.), 5 paıyzy sút ónimderine, 4 paıyzy kókónisterge, jemister men qantqa jumsalady. Bul biz aýyl sharýashylyǵy arqyly ózimizdi tolyǵymen qamtamasyz etýimiz kerek ónimder», — dedi vıtse-premer.
Sonymen qatar, Serik Jumanǵarın fermerlik jylyjaı ıelerine sýbsıdııa alý múmkindigin aıtty. Ol úshin jylyjaı sharýashylyqtaryn ulttyq standartqa sáıkes keltirý qajet. Bul oraıda sharýalarǵa saýda jáne ıntegratsııa mınıstrliginiń Tehnıkalyq retteý jáne metrologııa komıteti kómektesetin bolady.