Irannyń syrtqy ister mınıstri Máskeýge keldi
ASTANA. KAZINFORM – Irannyń syrtqy ister mınıstri Abbas Arakchı Máskeýde birqatar kelissóz júrgizbek. Sonymen qatar Reseı prezıdenti Vladımır Pýtınmen de kezdesý josparlanǵan, dep habarlaıdy reseılik TASS.
Reseı Federatsııasynyń resmı ókili Marııa Zaharovanyń aıtýynsha, Iran mınıstri Máskeýge kelissózder júrgizý úshin jeksenbi kúni keshkisin kelgen.
IRNA agenttiginiń habarlaýynsha, Irannyń syrtqy ister mınıstri AQSh pen Izraıldiń Iranǵa soqqy jasaýyna baılanysty óńirlik jáne halyqaralyq kún tártibine qatysty máseleler boıynsha Reseı kóshbasshysymen jáne joǵary dárejeli sheneýniktermen keńespek.
Arakchı Pýtınmen kezdesýiniń 23-shi maýsymǵa jsparlanǵanyn osyǵan deıin de aıtqan bolatyn. Bul rette ol RF men Iran arasynda strategııalyq áreptestik jóninde kelisim jasalǵanyn eske saldy. Osyǵan baılanysty Máskeý men Tegeran ózara keńesti turaqty ótkizip, ózderiniń is-áreketterin úılestirip otyrady.
Vladımır Pýtın osyǵan deıin Izraıldiń Irandy bombylaýyna baılanysty óziniń ustanymyn naqty jetkizgen bolatyn. Ol ıslam memleketiniń azamattyq ıadrolyq baǵdarlamany damytyp, atom tehnologııalaryn beıbit maqsatta qoldanýǵa quqy bar ekenin jetkizdi. Al MAGATE-de Irannyń ıadrolyq qarý jasap jatqany týraly eshqandaı málimet joq. Sonymen qatar Pýtın Máskeýdiń kelisim aıasyndaǵy barlyq mindettemelerin oryndap otyrǵanyn jáne Tegerannyń beıbit atomdy qosa alǵanda zańdy múddelerin qorǵaý isinde qoldap otyrǵynan jetkizdi.
Arakchı-diń Máskeýge saparyna AQSh prezıdentiniń qaýipsizdik boıynsha kómekshisiniń ýaqytsha mindetin atqarýshy, Memlekettik hatshy Marko Rýbıo pikir bildirdi.
Ol Irannyń syrtqy ister mınıstriniń Vashıngton emıssarlary emes Reseı jetekshiligimen kezdesýge bara jatqanyna qynjylatynyn bildirdi.
Soǵan qaramastan Rýbıo Reseı men Iran Syrtqy ister mınıstriniń kelissózderi boıynsha narazylyq bildire almaıtynyn aıtty.
Osyǵan deıin AQSh-tyń Irannyń ıadrolyq nysandaryna soqqy jasaǵany týraly jazdyq.
Iran AQSh-ty agressııa úshin aıyptap, halyqaralyq tergeýge alýdy talap etti.