Irannyń ońtústigindegi AQSh-tyń soqqylarynan 35 adam qaza tapty
ASTANA. KAZINFORM – AQSh-tyń Irannyń ońtústik óńirlerine jasaǵan sońǵy áýe shabýyldarynan 35 adam qaza taýyp, 300-den astam adam jaraqat aldy. Bul týraly Irannyń Densaýlyq saqtaý mınıstrligi málimdedi, dep habarlaıdy Sınhýa.
Mınıstrliktiń qoǵammen baılanys bóliminiń basshysy Hoseın Kermanpýr X áleýmettik jelisinde qaza tapqandardyń arasynda eki áıel men bir jasóspirim bar ekenin habarlady.
Onyń aıtýynsha, eń kóp zardap shekkender Hormozgan jáne Sıstan men Belýdjıstan provıntsııalarynda tirkelgen. Qazirgi ýaqytta jaralanǵandardyń 72-si aýrýhanada em qabyldap jatyr.
Iran armııasy óz saıtynda jarııalaǵan málimdemede sársenbige qaraǵan túni Sıstan men Belýdjıstan provıntsııasyndaǵy Bampýr aýdanyndaǵy áskerı garnızonǵa jasalǵan shabýyl saldarynan jeti áskerı qyzmetker qaza taýyp, taǵy 13-i jaralanǵanyn habarlady.
Sońǵy birneshe kúnde AQSh áskeri Irannyń ońtústik provıntsııalaryna birneshe márte soqqy jasady. Vashıngton bul shabýyldardy Iran kúshteriniń Ormýz buǵazyndaǵy kemelerge shabýylyna jaýap ári Tegerannyń halyqaralyq saýda kemelerine qaýip tóndirý múmkindigin álsiretý maqsatynda júrgizip jatqanyn málimdedi.
Óz kezeginde Iran Batys Azııadaǵy AQSh-tyń áskerı bazalary men nysandaryna zymyrandar jáne ushqyshsyz ushý apparattarymen birneshe ret jaýap soqqysyn jasady.
Eske sala ketsek, buǵan deıin AQSh Iranǵa qarsy jańa soqqylar serııasyn bastaǵanyn jazdyq.
Sondaı-aq Tramp Iran kelissózge oralmasa, kópirlerin tas-talqan etetinin eskertti.
Al Iran Ormýz buǵazyn ashýǵa negiz bolatyn sharttaryn usyndy.
