Irannyń negizgi munaı termınaly 25 kúnnen keıin jumysyn qaıta bastady
ASTANA. KAZINFORM – Iran Parsy shyǵanaǵyndaǵy Hark aralynyń batys termınalynda 25 kúndik tolyq úzilisten keıin munaı tıeý jumystaryn qaıta bastady, dep habarlaıdy Tasnim agenttigi.
Iran agenttiginiń málimetinshe, termınal 12 tamyzda qaıta iske qosylǵan. Spýtnıktik sýretter uzyndyǵy shamamen 333 metr bolatyn VLCC sanatyndaǵy munaı tankeriniń termınalǵa kelip, shıki munaı tıeýge kiriskenin kórsetedi. Keme 11 shildeden beri kútý aımaǵynda zákirde turǵan.
Hark araly – Irannyń munaı ınfraqurylymyndaǵy negizgi nysandardyń biri. Araldaǵy termınaldar arqyly Iran munaı eksportynyń shamamen 90%-y júzege asyrylady. Tereń sýly aılaq iri munaı tankerlerin qabyldaýǵa múmkindik beredi.
Tasnim Ormýz buǵazyna jaqyn Lark araly mańynda da keme qozǵalysy artqanyn habarlady. Agenttik keltirgen spýtnıktik derekterge sáıkes, 12 tamyzda bul aýdanda 35 munaı tankeri men júk kemesi bolǵan. Eki kún buryn olardyń sany 28 bolǵan.
Kemelerdiń shamamen 74%-y sáıkestendirý júıelerin óshirip qozǵalǵan. Keminde 10 keme sanktsııaǵa ilikken.
Eske sala ketsek, buǵan deıin Ormýz buǵazynda ADNOC munaı kompanııasynyń eki kemesine shabýyl jasalǵany habarlanǵan.
