Irannyń medıtsınalyq jabdyqtary qansha elge eksporttalady – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Irannyń medıtsınalyq jabdyqtary álemniń qansha eline eksporttalady – ParsToday
ParsToday aqparat agenttiginiń málimeti boıynsha, Iran Islam Respýblıkasy prezıdentiniń ǵylym jónindegi orynbasary eldiń medıtsınalyq jabdyqtar eksportynyń aıtarlyqtaı óskenin habarlady.
Iran Islam Respýblıkasy prezıdentiniń ǵylym jónindegi orynbasary Hoseın Afshın jeksenbi kúni Tehrandaǵy 26-shy «Iran Health 1404» halyqaralyq kórmesiniń ashylý saltanatynda ırandyq medıtsınalyq qural-jabdyqtar ónerkásibi belsendileriniń talpynystaryn baǵalaı otyryp, osy saladaǵy jańashyldyq, sapa jáne tehnologııalyq qoldaýdyń mańyzdylyǵyna toqtaldy, dep habarlaıdy ParsToday aqparat agenttigi.
Afshınnyń aıtýynsha, Irandyq dárigerler álem jetekshileriniń qatarynda jáne Iran óziniń maqtanarlyq múmkindikteriniń birin kórsetkisi kelse, medıtsına men emdeý salasy kúmánsiz eń kórnekti salalardyń qatarynda. Sondaı-aq onyń keltirgen málimetinshe, Irandyq medıtsınalyq jabdyqtar óndirýshileri densaýlyq saqtaý qaýymdastyǵyna joǵary sapaly, qaýipsiz jáne uzaq merzimdi ónimderdi shyǵarady jáne jetkizedi. Bul jabdyqty ırandyq dárigerler paıdalanýy senim men sapanyń joǵary deńgeıin kórsetedi, óıtkeni dárigerler eń joǵary sapa deńgeıimen eń jaqsy jáne qaýipsiz jabdyqty paıdalanýǵa mindettelgen.
Afshın Irannyń medıtsınalyq jabdyqtary eldiń bilimge negizdelgen ónerkásibiniń maqtanyshtarynyń biri bolyp tabylatyn ırandyq medıtsınalyq qural-jabdyqtardyń 60-tan astam elge eksporttalǵanyn tilge tıek etken.
Buhara halyqaralyq festıval aıasynda jahandyq týrıstik ortalyqqa aınaldy - «ÓzA»
Qazirgi kúnderi tarıhı Buhara qalasy halyqaralyq deńgeıdegi iri mádenı oqıǵa - XXI dástúrli «Jibek jáne dámdeýishter festıvaliniń» aıbyndy alańyna aınalyp otyr. Myńjyldyqtar boıy órkenıet toǵysqan bul kóne shahar búginde ulttyq rýh pen álemdik mádenı ártúrlilikti toǵystyrǵan merekeniń naǵyz úlgisine aınaldy, dep habarlaıdy «ÓzA» aqparat agenttigi.
Atalǵan aqparat kóziniń dereginshe, Sháhrıstan alańy – festıvaldiń negizgi sahnasy ispetti. Bul kúnderi munda sheteldik jáne jergilikti týrısterdiń qarasy qalyń, qonaqtar kóne Buharanyń erekshe rýhyn, baı murasyn, túrli ulttar men mádenıetterdiń toǵysqan saltanatyn kózben kórip, kóńilmen sezinýde.
Keltirilgen málimetterge súıensek, festıval aıasynda kórermender men qatysýshylardy alýan túrli mádenı baǵdarlamalar, ulttyq naqyshtaǵy qolóner jármeńkeleri, qoldanbaly óner kórmeleri, jandy mýzykalyq oryndaýlar men dámi men dástúri astasqan gastronomııalyq kórsetilimder kútip tur.
Festıvaldiń aıryqsha nazar aýdaratyn sátteri qatarynda, Jibek pen ulttyq qolóner buıymdary kórmesi, «Palaýdyń sáni» atty ulttyq taǵamdar baıqaýy, «Silk&Spices Fashion days» atty otandyq jáne sheteldik dızaınerler qatysatyn sán kórsetilimi qatarly birqatar mańyzdy is-sharalar ótedi.
Sondaı-aq osy aptada «ÓzA»-da «Ózbekstanda eńbekaqy, zeınetaqy, járdemaqy jáne stıpendııa 10 paıyzǵa ósedi» degen taqyryptaǵy aqparat jarııalandy.
Habarlamada aıtylýynsha, Ózbekstan Respýblıkasynyń Prezıdenti memlekettik bıýdjet uıymdary qyzmetkerleriniń eńbekaqysyn, zeınetaqy, járdemaqy jáne stıpendııany 10 paıyzǵa arttyrý jónindegi jarlyqqa qol qoıǵan.
Atap aıtqanda, 2025 jylǵy 1 shildeden bastap zeınetaqylar men járdemaqylar, sondaı-aq muqtaj otbasylarǵa tólenetin balalar járdemaqysy men materıaldyq kómek tólemderi mólsheri 10 paıyzǵa ulǵaıtylady.
Bul aqparatta jasqa baılanysty eń tómengi zeınetaqy, múgedektik boıynsha zeınetaqy kólemderi kórsetilgen.
Sondaı-aq, muqtaj otbasylarǵa jáne balalar járdemaqysynyń mólsheri, 3 jasqa deıingi bir balaǵa, 3 jastan 18 jasqa deıingi bir balaǵa, ekinshi, úshinshi jáne odan keıingi ár balaǵa beriletin qosymsha somalar kórsetilgen.
Sonymen qatar 2025 jylǵy 1 tamyzdan bastap bıýdjet mekemeleriniń qyzmetkerleriniń jalaqysy men stıpendııa 10 paıyzǵa arttyrylady.
«Órkenıetter sımfonııasy. jarasymdy ómir» atty úgit-nasıhat fılmi jarııalandy – «Halyq gazeti»
«Halyq gazetinde» «Órkenıetter sımfonııasy · jarasymdy ómir» atty úgit-nasıhat fılmi jarııalandy. Qytaılyq «Halyq gazeti» basylymynda osyndaı taqyryptaǵy aqparat jarııalandy.
Atalǵan BAQ-tyń deregine súıensek, ózara almasý arqyly órkenıet túrli-tústi bolady, ózara úırenýdiń arqasynda mazmuny baı bolady. Myńdaǵan jyldar boıy Qytaı Ortalyq Azııadaǵy barlyq etnıkalyq toptardyń halqymen birge Jibek jolynyń órkendeýine yqpal etip, álemdik órkenıetterdiń almasýy men ıntegratsııasyna, damýyna tarıhı úles qosty.
«Halyq gazeti» basylymynyń málimetinshe, Qazaqstannyń Astana qalasynda Qytaı-Ortalyq Azııa elderiniń ekinshi sammıti ótedi. Onlaın «Halyq Gazetiniń» órkenıetter almasýy jáne ózara úırený protsesinde Qytaı men Ortalyq Azııa halyqtary arasyndaǵy tamasha oqıǵalar men tereń dostyqty arqaý etken «Órkenıetter sımfonııasy. jarasymdy ómir» úgit-nasıhat fılmin jarııalady.
– Qytaı men Ortalyq Azııa elderiniń myńjyldyq dostyqty jalǵastyrýyn, jańa bolashaqty ashýyn, órkenıet shamshyraǵy adamzattyń durys jolynda jarqyraýy úshin birlesip jumys isteýin asyǵa kútemiz, - dep jazady «Halyq gazeti».
Sondaı-aq osy aptada «Halyq gazeti» basylymynda «Alǵashqy bes aıda Qytaıda jańa energetıkalyq kólikterdiń satylymy jańa kólikterdiń jalpy satylymynyń 44% -yn qurady» degen taqyryptaǵy aqparat jaryq kórdi.
Qytaılyq BAQ-tyń málimetinshe, alǵashqy bes aıda Qytaıda jańa energetıkalyq kólikterdiń satylymy jańa kólikterdiń jalpy satylymynyń 44% -yn quraǵan.
Atap aıtqanda, Qytaıdyń Avtomobıl ónerkásibi qaýymdastyǵynyń málimetteri boıynsha, osy jyldyń alǵashqy bes aıynda Qytaıda jańa energetıkalyq kólikterdiń óndirisi men satylymy qarqyndy ósken. Al jańa energetıkalyq kólikterdiń satylymy jalpy jańa kólikter satylymnyń 44%-yna jetken.
Túrkııa Rımde mádenı qazynalaryn usynady - TRT
«Túrkııadan shyqqan úsh túpnusqa jádiger men bir kóshirme Rımde ashylǵan jańa kórmede kórsetilýde», dep habarlady Túrkııanyń Mádenıet jáne týrızm mınıstrliginiń Mádenı muralar jáne murajaılar bas dırektsııasy. Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń dereginshe, «Kıbela – Magna Mater Idaea Rım, Týnıs jáne Jerorta teńizi arasynda» dep atalatyn kórme beısenbi kúni ashyldy. Bul shara Kolızeı arheologııalyq parki dırektsııasy men Týnıstiń Ulttyq mura ınstıtýtynyń yntymaqtastyǵymen uıymdastyrylǵan.
Al Mınıstrliktiń málimdeýinshe, jyl saıyn mıllıondaǵan kelýshini qabyldaıtyn bul halyqaralyq kórme alańynda túrik jádigerleriniń kórsetilýi «jádigerlerdi nasıhattaýǵa jáne Italııamen tereń tamyrly baılanystardy nyǵaıtýǵa» úlken múmkindik retinde qarastyrylady.
Aıta keteıik, 5 qarashaǵa deıin kelýshilerge ashyq bolatyn bul kórmede Týnıstegi ejelgi Zama qalasynan tabylǵan jádigerlermen qatar kórmede barlyǵy 92 jádiger usynylǵan. Olardyń ishinde Italııa murajaılarynan 30 jádiger, Vatıkannan úsh, Grekııadan tórt, AQSh-tan eki, Germanııa men Danııadan bir-birden, Bolgarııadan bes jáne Belgııadan 10 jádiger bar.
Sondaı-aq «TRT» basylymynda «Qajylardy qatty ystyqtan qorǵaý úshin 155,000 tonna salqyndatý júıesin iske qosty» degen taqyryptaǵy aqparat jarııalandy.
Atalǵan BAQ-tyń dereginshe, bıyl Saýd Arabııasynda qajy bolý úshin mıllıonnan astam adam jınalǵan.
Keltirilgen derekterge súıensek, aımaqtaǵy aýa temperatýrasy kúrt kóterilgen kezde, Saýd Arabııasy Mekkedegi Ál-Haram meshiti men Mádınadaǵy Án-Nábáýı meshitinde álemdegi eń iri salqyndatý júıesin iske qosty. Bul qajylyq saparyn bastaǵan mıllıonnan astam qajynyń ystyq aýa raıynda qulshylyqtaryn jeńildetý úshin jasaldy. Aýa temperatýrasy 40° Tselsııden asýy múmkin dep boljanýda.
Saýd gazetiniń málimetinshe, bul erekshe júıeniń jalpy salqyndatý qýaty 155,000 tonnaǵa jetedi.
– Aýa sapasyn ońtaıly deńgeıde saqtaý úshin júıe aýadaǵy qospalardyń 95 paıyzyn tazartýǵa qabiletti zamanaýı tazartý tehnologııalaryn qoldanady. Bul qajylar úshin taza jáne qaýipsiz orta qalyptastyrýǵa múmkindik beredi, ásirese jazdyń ystyq kúnderinde, - dep jazady túrkııalyq BAQ.