Irannyń málimdemesinen keıin munaı baǵasy kúrt tómendedi

ASTANA. KAZINFORM — Iran tarapynan Izraılge áskerı qaqtyǵystardy toqtatý jónindegi usynysynan keıin munaı baǵasy 3,2%-ǵa tómendedi. Bul yqtımal bitimge degen úmitti kúsheıtip, óńirden munaı jetkizýge qaýip tónýi múmkin degen alańdaýshylyqty álsiretti, dep habarlaıdy Qazaqstan qarjygerler qaýymdastyǵy.

Munaı naryǵy

Dúısenbi kúngi saýda nátıjesinde munaı barreliniń baǵasy $73,2-ǵa deıin tómendedi (-3,2%). Iran, Qatar, Saýd Arabııasy jáne Oman arqyly AQSh prezıdenti Donald Trampqa Izraılge otty toqtatý úshin qysym jasaýǵa ótinish bildirdi. Buǵan jaýap retinde Tegeran ıadrolyq baǵdarlamasy boıynsha kelissózderge ıkemdilik tanytýǵa daıyn ekenin jetkizgen.

Ulttyq valıýta jáne valıýtalyq naryq

Dúısenbi kúngi saýda qorytyndysy boıynsha, AQSh dollarynyń baǵamy 512,60 teńgege (+0,50 tg) sál ósti. Jyl ortasynda bıýdjet qarjysynyń ıgerilýine baılanysty shetel valıýtasyna suranys artady, bul ımporttyń ulǵaıýyna ákeledi. Sonymen qatar, munaı baǵasynyń túzetilýi jáne geosaıası shıelenis te teńgege qysym kórsetip otyr.

Aqsha naryǵy

Qysqa merzimdi ótimdilikke suranystyń birshama ósýi nátıjesinde aqsha naryǵyndaǵy mólsherlemeler dúısenbide kóterildi, biraq bazalyq mólsherleme dáliziniń tómengi shegine jaqyn deńgeıde qaldy.

• TONIA mólsherlemesi: 15,57% → 15,62%

• SWAP-1D mólsherlemesi: 10,48% → 10,62%

• Saýda kólemi: 552 mlrd teńge (+33 mlrd)

• Ulttyq Banktiń depozıttik aýktsıonynda suranys: 1,6 trln teńge (+1,0 trln), mólsherleme: 16,5%

• Ulttyq Banktiń ashyq pozıtsııasy: 8,0 trln teńge

Qor naryǵy

KASE ındeksi aptany 1,1%-dyq ósimmen bastap, 5 864 pýnktke deıin jetip, jańa tarıhı rekord ornatty. Saýda kólemi 1,7 ese ósip, 900 mln teńgege jetti.

Negizgi ósimge úles qosqan aktsııalar:

• Qazatomónerkásip: +4,0%

• Air Astana: +3,2%

• QazMunaıGaz (KMG): +2,0%

• Bank TsentrKredıt (BTsK): +1,4%

• KEGOC: +1,1%

Bul keń aýqymdy satyp alýlar naryqqa jańa ótimdiliktiń kelýin, sonyń ishinde dıvıdendterdiń qaıta ınvestıtsııalanýyn bildirýi múmkin.

Freedom Holding Corp. kompanııasy 2024 jyldyń 1 sáýiri – 2025 jyldyń 31 naýryzy aralyǵynda tabysyn 23%-ǵa, 2,05 mlrd dollarǵa deıin arttyrdy. Osy málimettiń fonynda onyń aktsııalary Nasdaq-ta 3,2%-ǵa ósti.

Qundy qaǵazdar jáne qorǵanys aktıvteri

• AQSh-tyń 10 jyldyq oblıgatsııalary: tabystylyǵy 4,45% deıin ósti (juma kúni 4,42%)

• AQSh dollar ındeksi: 98,0 pýnktke deıin tómendedi (-0,3%)

• Altyn fıýchersteri: 1,2%-ǵa tómendep, 1 ýntsııasy $3 423 boldy

Táýekel aktıvteri

AQSh-tyń qor naryqtary Irannyń áskerı áreketterdi toqtatýǵa umtylatyny týraly málimdemesinen keıin 0,8-1% ósti.

Tehnologııalyq sektorda:

• Advanced Micro Devices aktsııalary: +9%

• Marvell Technology, Arm Holdings, ON Semiconductor: shamamen +5%

• PHLX Semiconductor ındeksi: +3%

Buǵan deıin habarlanǵandaı, Brent markaly munaı 4,3 paıyzǵa qymbattady.