Irannyń Qazaqstannan alatyn astyǵy bıyl da byltyrǵy kólemde saqtalýy múmkin - Elshi
ASTANA. KAZINFORM – Irannyń Qazaqstandaǵy Tótenshe jáne Ókiletti Elshisi Alı Akbar Djoýkar Iran Islam revolıýtsııasynyń 46 jyldyǵyna oraı BAQ ókilderimen kezdesip, eki el arasyndaǵy baılanystar týraly málimet berdi.
Kezdesý barysynda elshige eki aradaǵy astyq saýdasynyń búgini men keleshegi týraly suraqtar qoıyldy.
- Iran Qazaqstannyń ımporttaıtyn astyq kólemi bir jylda birden 40 paıyz artýyna eshqandaı geosaıası jaǵdaı áser ketken joq. Bul eki eldiń memleket qaıratkerleriniń jáne astyq bıznesimen aınalysatyndardyń arasyndaǵy ózara tyǵyz baılanystyń jemisi. Onyń aldyndaǵy jyldary Qazaqstan eksporttaıtyn astyqtyń tómendeýine baǵa sebep bolǵan edi. Qazir baǵa biraz tepe-teńdikke keldi.
Resmı Tehran ózine qajetti azyq-túlikti, basqa da mańyzdy taýarlardy eń áýeli kórshiles, baýyrlas elderden ımporttaýdy basym baǵyt retinde ustanady, muny basa aıtý kerek, - dedi Iran elshisi.
Onyń sózinshe, Kaspıdiń aıdynyn bólisip jatqan irgeles el bıyl da Qazaqstannan alatyn astyq kólemin arttyrýy múmkin.
- Qazaqstannyń Iranǵa eksporttaıtyn taýarlarynyń kólemi ishki áleýetine de baılanysty. Keıbir jyldar ózimizde kóp óndirilip jatady. Mundaı kezde Qazaqstan eksportynyń kólemi azaıady degendeı.
Bıyl Qazaqstannan qansha astyq alatynymyz da osy ishki óndiriske baılanysty. Ol kóktemge qaraı belgili bolady. Meniń boljamym boıynsha byltyrǵy mólsher tómendemeıdi dep oılaımyn. Osy kólem saqtalyp, tipti joǵarylaýy múmkin, - dedi dıplomat.
Al Aýyl sharýashylyǵy mınıstrliginiń málimeti boıynsha, Iran baǵytyna eksporttalǵan astyq kólemi bir jylda eki ese artqan. Jalpy, byltyr Qazaqstannan 8,1 mln tonna tonna astyq shyǵarylǵan.
Onyń ishinde:
— Ózbekstanǵa — 3,3 mln tonna, bul 2023 jylǵy deńgeıden 5%-ǵa tómen (3,45 mln tonna);
— Tájikstanǵa — 1,2 mln tonna, (1 mln tonna);
— Qyrǵyzstanǵa — 140 myń tonna, (73 myń tonna);
— Qytaıǵa — 1,7 mln tonna, (1,9 mln tonna);
— Aýǵanstanǵa — 289 myń tonna, 2023 jyldan (449 myń tonna);
— Iranǵa — 526 myń tonna, (245 myń tonna) astyq jóneltken.