Irannyń Qazaqstandaǵy Elshisi: Izraıl HAMAS-tyń áskerı áleýetin kemsitý úshin Iranǵa jala jaýyp otyr

Izraıl HAMAS-tyń áskerı áleýetin álem qaýymdastyǵynyń kóz aldynda kemsitip kórsetý úshin Iranǵa jala jaýyp otyr. Iran Islam Respbýlıkasynyń Qazaqstandaǵy Tótenshe jáne ókiletti elshisi Álı Akbar Djoýkar BAQ ókilderine bergen suhbatynda osyndaı pikir aıtty, dep habarlaıdy Kazinform. 

«Ózderińiz bilesizder, sol oqıǵadan keıin AQSh jáne Izarıldiń barlaý qyzmeti jarııalaǵandaı bul oqıǵada Irannyń eshqandaı qatysy bolmaǵan. Sondaı-aq sol oqıǵalardan keıin Iranny joǵary dinı jetekshisi Irannyń bul oqıǵada eshqandaı qatysy bolmaǵanyn aıtty. Basqalardyń ózi sony aıtyp otyr», - dedi Iran Elshisi.

Álı Akbar Djoýkar Palestına men Izraıl arasyndaǵy tartystyń tarıhyn qadaǵalap kele jatqan kez kelgen adam Irannyń bul qaqtyǵystarǵa eshqashan tikeleı aralaspaǵanyn biledi dep esepteıtinin aıtty.

«Izraıldiń bul shabýylǵa Irannyń qatysy bar dep málimdeýiniń sebebine úńilsek, astarynda mynandaı maqsat jatqan bolýy múmkin. HAMAS-tyń 7 qazan kúngi senbidegi shabýyly joıqyn bolǵany uıymnyń áskerı áleýetin kórsetti. Sol áskerı áleýetti eleýsiz etip kórsetý úshin artynda Iran tur dep málimdep otyrǵan bolýy yqtımal», - dedi Álı Akbar Djoýkar.