Irannyń fýtbol quramasy 2026 jylǵy ÁCh-ǵa arnalǵan jattyǵý bazasyn AQSh-tan Meksıkaǵa kóshiredi
ASTANA. KAZINFORM – Irannyń fýtbol quramasy Taıaý Shyǵystaǵy qaýipsizdik máseleleri aıasynda jattyǵý bazasyn kóshirýdi qarastyryp jatyr, dep habarlaıdy The Guardian.
Iran fýtbol federatsııasynyń (FFIRI) prezıdenti Mehdı Tadj FIFA-nyń maquldaýyn alǵannan keıin komandanyń álem chempıonatyna arnalǵan jattyǵý bazasy AQSh-tan Meksıkaǵa kóshirilgenin málimdedi.
- Álem chempıonatyna qatysatyn komandalardyń barlyq bazalyq lagerlerin FIFA bekitýi tıis. Abyroı bolǵanda, bizdiń ótinishterimiz ben FIFA ókilderi jáne Ystanbuldaǵy álem chempıonatyn uıymdastyrýshylarmen kezdesýlerimizden soń, sondaı-aq keshe Tegeranda FIFA-nyń qurmetti Bas hatshysymen ótkizgen vebınarymyzdan keıin komandanyń bazasyn AQSh-tan Meksıkaǵa kóshirý týraly ótinishimiz qanaǵattandyryldy, - dep málimdedi Mehdı Tadj.
Alaıda Halyqaralyq fýtbol federatsııasy bul sheshimge qatysty áli túsinikteme bergen joq.
Bastapqyda Iran jattyǵýdy Arızonada ótkizetini josparlanǵan. Endi komanda San-Dıegodan ońtústikke qaraı, Meksıkanyń Tıhýana qalasynda ornalasýdy josparlap otyr.
Federatsııa komanda AQSh-qa Meksıka arqyly kiretindikten bazalyq lagerdi kóshirý vızaǵa qatysty áleýetti máselelerdi sheshetinin málimdedi.
Eske sala ketsek, fýtboldan álem chempıonaty 11 maýsymnan 19 shildege deıin ótedi jáne ony AQSh, Kanada jáne Meksıka birlesip ótkizedi.
Iran quramasy G tobyndaǵy oıyndaryn Los-Andjeleste 15 maýsymda Jańa Zelandııa jáne 21 maýsymda Belgııa quramalaryna qarsy ótkizedi, sodan keıin 26 maýsymda Sıetlde Mysyrmen kezdesedi.
Osyǵan deıin 2026 jylǵy fýtboldan álem chempıonatyna qatysatyn Iran ulttyq quramasy AQSh vızasyn alý úshin Ankaradaǵy elshilikke ótinish tapsyrdy.
