Irannyń Býsher atom elektr stantsııasyna shabýyl jasaldy: MAGATE sabyr saqtaýǵa shaqyrdy

ASTANA. KAZINFORM — Atom energııasy jónindegi halyqaralyq agenttik (MAGATE) sársenbi kúni Irannan «Býsher» atom elektr stantsııasy keshenine shabýyl jasalǵany týraly habarlama alǵanyn málimdedi.

Halyqaralyq agenttiktiń habarlaýynsha, stantsııaǵa keltirilgen zalal nemese adam shyǵyny týraly eshqandaı habarlama túsken joq. 

— Bas dırektor ıadrolyq apat qaýpin boldyrmaý úshin qaqtyǵys kezinde barynsha sabyr saqtaýǵa shaqyrdy, — delingen MAGATE málimdemesinde.

«Rosatom» buǵan deıin Irandaǵy «Býsher» AES-ke jasalǵan soqqydan keıin málimdeme jasaǵan bolatyn. 

Reseılik korporatsııanyń basshysy Alekseı Lıhachevtiń málimdeýinshe, AES-ke jasalǵan soqqy metrologııa qyzmeti ǵımaratyna irgeles jumys istep turǵan energoblokqa jaqyn aýmaqqa jasalǵan.

— «Rosatom» memlekettik korporatsııasynyń qyzmetkerleri arasynda qaza tapqandar joq. Alańdaǵy radıatsııalyq jaǵdaı qalypty. Bul qaqtyǵys bastalǵannan beri AES alańynda tirkelgen alǵashqy soqqy, — dedi Lıhachev.

Onyń aıtýynsha, osyǵan deıin Irannan «Rosatom»-nyń shamamen 250 qyzmetkeri men olardyń otbasylary evakýatsııalanǵan. Qazirgi ýaqytta stantsııada shamamen 480 reseılik qyzmetker qalyp otyr jáne qyzmetkerlerdi úshinshi ret evakýatsııalaýǵa daıyndyq júrip jatyr. 

Lıhachev sondaı-aq Reseı shabýyldy aıyptaıtynyn jáne qaqtyǵys taraptaryn «AES aımaǵyndaǵy jaǵdaıdy báseńdetý úshin barlyq múmkin kúsh-jiger salýǵa» shaqyratynyn atap ótti.

Osyǵan deıin «Rosatom» Irandaǵy AES-tegi jumysyn toqtatqanyn habarlaǵan bolatynbyz.