Irannyń birneshe qalasynda jarylys boldy

ASTANA. KAZINFORM – Irannyń ońtústigindegi portty qala Bender-Abbasta qýatty jarylys boldy, dep habarlaıdy Euronews.

Bul Islam revolıýtsııasy saqshylar korpýsy áskerı-teńiz kúshteriniń qolbasshysy Alıreza Tangsırıge qastandyq jasaý áreketi bolýy múmkin.

Al Islam revolıýtsııasy saqshylar korpýsymen baılanysty Tasnim aqparat agenttigi Tangsırıdiń qaza tapqany týraly aqparat shyndyqqa sáıkes kelmeıtinin habarlady.

Keıbir derekterde jarylys gazdyń syrtqa shyǵýy saldarynan bolýy múmkin delinse, basqa aqparat kózderinde ǵımaratta gaz qubyry múlde joq ekeni aıtylǵan.

Sondaı-aq Irannyń basqa qalalarynda da jarylystar serııasy tirkelgeni habarlandy. Atap aıtqanda, Iran men Irak shekarasyna jaqyn ornalasqan Ahvaz qalasynda keminde tórt adam qaza tapqan. Oqıǵanyń sebepteri ázirge belgisiz.

Buǵan deıin Islam revolıýtsııasy saqshylar korpýsy osy apta sońynda Parsy shyǵanaǵy akvatorııasynda áskerı-teńiz jattyǵýlaryn ótkizýdi josparlap otyrǵanyn málimdegen bolatyn. Bul jaǵdaı AQSh Ortalyq qolbasshylyǵynyń reaktsııasyn týdyryp, olar Tegerandy teńizdegi arandatýshylyq áreketterden aýlaq bolýǵa shaqyrdy.

Reuters agenttigi ızraıldik resmı tulǵalarǵa silteme jasap, Iranda bolǵan jarylystar serııasyna Izraıldiń qatysy joq ekenin habarlady.

Buǵan deıin Vashıngtonda Iran tóńireginde saqtalyp otyrǵan shıelenis aıasynda Tegeranmen dıplomatııalyq baılanys ornatý múmkindigi týraly aıtylǵan bolatyn.