Irannyń Bender-Abbas portyndaǵy jarylystan qaza tapqandar sany 70 adamǵa jetti
ASTANA. KAZINFORM – 2024 jylǵy 26 sáýirde Irannyń Hormozgan provıntsııasyndaǵy Bender-Abbas portynda bolǵan jarylystan qaza tapqandar sany 70 adamǵa jetti, dep habarlaıdy Anadoly.
Bul týraly Irannyń memlekettik telearnasy Tótenshe jaǵdaılar basqarmasynyń baspasóz hatshysy Hoseın Zeferıge silteme jasap habarlady.
Onyń aıtýynsha, jarylystan zardap shekken 1072 adam aýrýhanadan shyǵarylǵan, 120 adam áli de em qabyldap jatyr.
Kúshti jarylys 26 sáýir kúni túste, Irannyń ońtústigindegi Parsy shyǵanaǵy jaǵalaýynda ornalasqan Bender-Abbas portynda bolǵan. Oqıǵa ornynan túsirilgen sýretterde porttyń bir bóligi qatty zaqymdanǵany kórinedi.
Iran bıligi ázirge bul jarylystyń dıversııa áreketi ekenin rastaıtyn dálelder joq ekenin málimdedi.
Irannyń ishki ister mınıstri Iskander Mýmını memlekettik telearna arqyly jarylystyń sebebi – qaýipsizdik sharalarynyń saqtalmaýy men jaýapty tulǵalardyń salǵyrttyǵy ekenin rastady.
Jarylystan keıin shyqqan órt tolyq sóndirilgen.
Aıta ketelik Irannyń ońtústigindegi portta joıqyn jarylys bolǵan edi. Oqys oqıǵa saldarynan kem degende 14 adam qaza taýyp, 750-den astam adam jaralandy.
Qaıǵyly oqıǵaǵa baılanysty Memleket basshysy Iran Prezıdentine kóńil aıtý jedelhatyn joldady.