Irannyń Bender-Abbas portynan bergen jer telimin Qazaqstan nege áli ıgermeı otyr – SІM jaýaby

ASTANA.KAZINFORM – Syrtqy ister mınıstrliginiń resmı ókili Aıbek Smadııarov Irannyń Bender-Abbas portynan Qazaqstanǵa berilgen jer telimine nege saýda termınaly áli salynbaı jatqanyn túsindirdi. 

– Iran – biz úshin óte mańyzdy kórshi. Baǵana da aıttym, Qazaqstannyń Syrtqy ister mınıstri jaqyn arada Iran tarabynyń shaqyrýy boıynsha resmı saparmen barady. Árıne, osy kezdesý kezinde siz aıtqan másele de talqylanady. Bizdiń Bender-Abbasqa degen kózqarasymyz óte joǵary. Parsy shyǵanaǵyna, Afrıka elderine shyǵatyn úlken dálizdiń bir bóligi dep esepteımiz. Ol jaqty jaqsylap, muqııat tekserý kerek. Bizdiń kólik salasynyń mamandary jaqynda baryp zertteıdi, - dedi ol.

Jýrnalıst bul joba nege birneshe jylǵa sozylyp ketkenin surady.

– Endi geosaıası jaǵdaıdy ózińiz bilesiz ǵoı. Árbir kórshimiz sanktsııanyń astynda. Bizge ońaı emes. Sondyqtan syrtqy saýda máseleleri óte kúrdeli, - dedi Aıbek Smadııarov.

Eske salsaq, Iran Islam Respýblıkasynyń Qazaqstandaǵy Tótenshe jáne Ókiletti Elshisi Alı Akbar Djoýkar atalǵan jer telimine qyzyǵýshylyq tanytyp otyrǵan adamdar kóp ekenin aıtqan bolatyn.