Irannyń baıytylǵan ýranyna tek eki memleket qana qol jetkize alady - Tramp
ASTANA. KAZINFORM - AQSh prezıdenti Donald Tramp Iranmen kelisim jasaýǵa jaqyn qalǵanyn málimdedi. Alaıda onyń naqty qashan jasalatynyn aıta almady, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
NBC News arnasynyń «Meet the Press» baǵdarlamasyna bergen suhbatynda Tramp Iranmen qaqtyǵys pen yqtımal kelisimniń jaı-japsaryn sóz etti.
AQSh prezıdentiniń aıtýynsha, Vashıngton bul jaǵdaıdy aýqymdy soǵys retinde qarastyrmaıdy.
– Men muny áskerı jattyǵý dep ataımyn, – dedi Donald Tramp.
Ol Iran basshylyǵynyń «negizinen tolyqtaı joıylǵanyn» aıtyp, eldiń áskerı-teńiz kúshteri, áskerı-áýe kúshteri men áýe qorǵanysy júıesine aýyr soqqy jasalǵanyn málimdedi.
Tramptyń sózinshe, Irannyń zymyrandary men ushqyshsyz apparattarynyń shamamen 21-22 paıyzy ǵana qalǵan.
Sondaı-aq ol AQSh engizgen teńiz blokadasy tıimdi nátıje berip jatqanyn aıtty.
– Bul shara óte tıimdi boldy. Olar kúnine 400-500 mıllıon dollar joǵaltyp jatyr, – dedi AQSh prezıdenti.
Soǵan qaramastan, Tramp Taıaý Shyǵystaǵy amerıkalyq áskerdi shyǵarýǵa nıetti emes ekenin jetkizdi.
– Saqtyqta qorlyq joq. Ol jaqta bizdiń kóptegen adamymyz bar. Olardyń qaýipsizdigi tolyq qamtamasyz etilgen, – dedi ol.
Tramp Vashıngtonnyń Irandaǵy úshinshi saıası toppen kelissóz júrgizip jatqanyn da málimdedi.
– Biz qazir úshinshi toppen jumys istep jatyrmyz. Olar múlde basqa adamdar. Muny bıliktiń aýysýy deýge de bolady. Olar áldeqaıda parasatty ári óte aqyldy dep esepteımin, – dedi AQSh prezıdenti.
Sonymen qatar ol Tegeranǵa qatysty qatań ustanymyn saqtap otyrǵanyn ańǵartty.
– Uzaq ýaqyt bılikte bolǵan jetekshiler endi joq. Ekinshi býyndaǵy basshylar da qalmady. Menińshe, biz ne tez arada nátıjege jetemiz, ne áskerı jolmen máseleni tolyq sheshemiz, – dep málimdedi Donald Tramp.
AQSh prezıdenti qajet bolǵan jaǵdaıda Irannyń Joǵarǵy kóshbasshysynyń ulymen kezdesýge daıyn ekenin de aıtty.
– Eger ol qalasa, kezdeser edim. Biraq onymen tikeleı sóılesken joqpyn, – dedi Tramp.
Iranmen kelisim jasaý perspektıvasyna toqtalǵan AQSh prezıdenti taraptardyń mámilege jaqyn ekenin jetkizdi.
– Meniń oıymsha, maqsatqa óte jaqyn qaldyq. Birneshe másele ǵana qaldy. Onyń ózi asa mańyzdy emes sııaqty. Olar ıadrolyq qarý jasamaıtynyn moıyndady, – dedi ol.
Tramptyń pikirinshe, Iran kelisim jasaýǵa múddeli, alaıda bul belgili bir ýaqytty talap etedi.
– Bul olar úshin ońaı emes. Olar myqty ári namysshyl halyq. Tańdaý múmkindigi de kóp emes. Sondyqtan ýaqyt qajet bolady, – dedi AQSh prezıdenti.
Sondaı-aq ol Irannyń baıytylǵan ýrany taýly aımaqta jasyrylǵanyn aıtyp, oǵan qol jetkizý múmkindigi shekteýli ekenin málimdedi.
– Oǵan tek eki el ǵana jete alady – AQSh pen Qytaı. Óıtkeni mundaı jumystardy atqara alatyn tehnıka bizde ǵana bar. Jaqyn arada izdeý jumystaryn bastaımyz. Eger kelisimge qol jetkizsek, muny ırandyqtarmen birlesip júzege asyramyz, – dedi Tramp.
Onyń aıtýynsha, AQSh atalǵan aýmaqtaǵy kez kelgen qozǵalysty baqylaýda ustap otyr.
– Eger ol jerge bireý kirse, jer qazatyn tehnıka, júk kóligi nemese traktor paıda bolsa, biz ony birden bilemiz. Tıisti shara qabyldaımyz, – dedi ol.
Degenmen Donald Tramp Iranmen yqtımal kelisimniń naqty qashan jasalatynyna qatysty merzim ataǵan joq.
Buǵan deıin AQSh Ókilder palatasy Iranmen qaqtyǵysty toqtatýdy qoldaıtyn qarardy maquldaǵany habarlanǵan bolatyn.
Osyǵan deıin Tramp Netanıahýdyń Iranmen jasalǵan kez kelgen beıbit kelisimdi qabyldaıtynyn aıtqan bolatyn.
