Irannyń ballıstıkalyq zymyrany Izraıl aýrýhanasyna tústi
ASTANA. KAZINFORM - Irannyń ballıstıkalyq zymyrany Izraıldiń Beer-Sheva qalasyndaǵy «Soroka» medıtsınalyq ortalyǵyna tıip, beıbit turǵyndar jaraqat aldy, dep habarlaıdy Kazinform tilshisi.
Izraıl qorǵanys kúshteriniń málimetinshe, 19 maýsym kúni tańerteń Iran men Izraıl arasyndaǵy úzdiksiz soqqy almasý barysynda 30-ǵa jýyq ballıstıkalyq zymyran atyldy, olardyń bir bóligi Izraıldiń ortalyq jáne ońtústigine baǵyttaldy.
Dárigerler Izraıldiń ortalyq bóliginde úsh adam zardap shekkenin habarlady.
Izraıldiń ońtústigindegi «Soroka» medıtsınalyq ortalyǵynyń hırýrgııalyq korpýsy qıraǵany habarlandy. Aýrýhananyń bas dırektory, professor Shlomı Kodesh ǵımarattaǵy adamdar aldyn ala evakýatsııalanǵanyn, qyzmetkerler men naýqastar arnaıy baspanalarǵa jetkizilgenin aıtty.
- Zymyran Sorokadaǵy eski hırýrgııalyq ǵımaratqa tıdi. Bul sońǵy kúnderi evakýatsııalanǵan salystyrmaly túrde eski ǵımarat, - dep keltiredi The Times of Israel Shlomı Kodeshtiń sózin.
- Aýrýhananyń basqa ǵımarattaryna aıtarlyqtaı zaqym keldi. Barlyq naýqastar men qyzmetkerler baspanalarǵa kóshirildi. Ǵımaratta qalǵan birer adam jeńil jaraqat aldy, - dep qosty ol.
Aýrýhana halyqty asa qajet bolmasa medıtsınalyq mekemege kelmeýge shaqyryp, keıbir naýqastar basqa mekemelerge aýystyrylatynyn aıtty.
Izraıl densaýlyq saqtaý mınıstri Ýrıel Býso aýrýhanaǵa jasalǵan shabýyldy Irannyń áskerı qylmysy jáne lańkestik áreket dep atady.
Onyń aıtýynsha, mınıstrlik shabýylǵa aldyn ala daıyndalǵan, bul oǵan aýqymdy tragedııany boldyrmaýǵa múmkindik berdi.
Izraıl prezıdenti Ishak Gertsog Iran shabýyly qorǵansyz azamattarǵa – sábıler, analar, qart naýqastar men medıtsına qyzmetkerlerine baǵyttalǵanyn aıtty.
Ol Soroka evreıler men arabtar jumys isteıtin, ızraıldikter de, palestınalyqtar da emdeletin oryndardyń biri ekenin basa aıtty.
Iran tarapy soqqynyń jaqyn mańdaǵy áskerı nysanǵa baǵyttalǵanyn alǵa tartsa, Izraıl eń jaqyn áskerı baza aýrýhanadan eki shaqyrymnan astam jerde ornalasqanyn alǵa tartady.
Kýágerlerdiń aıtýynsha, ǵımarattaǵy shabýyldan keıin qara tútin kóterile bergen. Medıtsınalyq ortalyq qyzmetkerleri soqqynyń aýqymdylyǵyna qaramastan, kóp naýqastyń zardap shekpegenin aıtady.
Netanıahý Iranǵa qarsy soqqylardy kúsheıtýdi buıyrdy.