Irannyń áýe qorǵanysy F-15 joıǵysh ushaǵyn atyp túsirdi
ASTANA. KAZINFORM – Irannyń ońtústiginde áýe qorǵanys kúshteri F-15 joıǵysh ushaǵyn atyp túsirdi. Bul týraly Iran memlekettik telearnasy Áýe qorǵanysynyń birikken shtabyna silteme jasap habarlady. Málimetke sáıkes, qarsylasqa tıesili F-15 eldiń ońtústiginde joıyldy.
Resmı málimdemede ushaq áýe shabýylyna qarsy qorǵanys kúshteriniń zenıttik-zymyran keshenderi arqyly atyp túsirilgeni jáne onyń Parsy shyǵanaǵyndaǵy Ormýz araly mańyna qulaǵany aıtylǵan.
Oqıǵanyń mán-jaıyn anyqtaý úshin tergeý bastaldy. Sonymen qatar AQSh pen Izraıl ázirge joıǵysh ushaqtyń qulaýy týraly aqparatqa pikir bildirgen joq.
Aıta keteıik, Iran 19 naýryz kúni AQSh-qa tıesili F-35 ushaǵyn atyp túsirgenin málimdegen. Al keshe Izraıldiń F-16 joıǵyshynyń atylǵanyn habarlaǵan.
AQSh Qarýly kúshteri óz kezeginde Iran shabýyl jasaǵan F-35 ushaǵy qatty qoný saldarynan qıraǵanyn málimdedi. Al Tel-Avıv Izraıl Áýe kúshteriniń F-16 ushaǵy Iran áskeri tarapynan atqylaýǵa ushyraǵanymen, eshqandaı zaqym almaǵanyn habarlady.
Aıta keteıik, buǵan deıin Iran Ormýz buǵazyn tolyq jaýyp tastaýy múmkin ekeni habarlandy.
